U MLA ka KHNAM na North Shillong u Adelbert Nongrum da wanrah u ya ka phang kawa da ktik wei kawa khia bha wow pynkylla ya ka bhah thungkreh namo ka Reservation Policy yong ka jylla hapoh ka yung dorbar ynne ka sngi.
Hawa wanrah ya kani ka phang, u Adelbert da ong wa i wanrah yong oo ya kani ka pahng ym toh wow pynchit jaitbru namo wa yoo sih ya kiwi ki jaitbru yong ka jylla, tangwa toh neidaw wa sñiawkhia ya ka roi ka saan yong ka jylla hadien 50 snem wa da lai wei heiwon i kylla.
Da dawa u wa hadien 50 snem da toh wow pynkylla, wow bichaar biang ya kani ka aiñ kawa e bhah kreh 40% ya ki Garo wa 40% ya ki Khasi-Jaiñtia wa 20% ya kiwi.
Da ong u wa kammon ka Policy u sah ko kamjooh hadien 50 snem leh, deiwa ong wa da wanrah u ya kani neibynta kitu wym em sur, deiwa kdaw leh wa ka Office Memorandum (OM) kawa ha 12 tarik Duyatra (Jan) 1972, kawa man heipor wa ka Meghalaya ym pat u em man ko ka jylla wa pura.
Da ong u wa ha u snem 1971 ka Meghalaya em ko 10 lak ngut kiwa chong chnong, 3 lak tam toh ki Garo wa ki Khasi-Jaintia em ki 4 lak tam, iwa mut wa iwa em kiwa chong chnong yong ki Garo em ki 41% katwa ki Khasi-Jaiñtia em ki 58% wei kani ka 40% ya ki Garo pynyoo ko wa toh kawa noh chilliang. Hei yong sakhiat toh u man ko 33% ya ki Garo wa 46% ya ki Khasi-Jaiñtia.
Da ong u wa i yabi u waka sorkar MDA kawa da synchaar la 4 snem toh na kani ka phang ym toh neidaw ka chuki.
Hawa chimbynta hajrong kani ka phang, ka MLA ka Congress wa da chah beh na East Shillong, ka Ampareen Lyngdoh ym kwah ko wow yachah lane wow kyntait ya ka phang wa da wanrah da u MLA ka North Shillong wow pynkylla namo wow bichaar biang ya ka Reservation Policy hapoh ka yung dorbar chna aiñ ynne ka sngi.
Katkam i ong ka Ampareen, kani ka phang toh kawa da yatai bha ki paidbah ha man ki thlu yung wei ym kwah ko wow man kawa chongchit hajrong kani ka phang kawa ktah ya ki paidbah. Da ong wa iwa bakla wow ong wa du ki Khasi kiwa chah ktah tangwa ki Jaiñtia wa ki Garo leh chah ktah lang ki.
Da ong ko wa man iwa emkaam wow thooh ya ki daw lada kani ka Policy man ko kawa chongnia, kawa chong aiñ namo ym em. Heiwa da pynrap ko wa man iwa sakhiat wa em i wym che hajrong kani ka bhah thung kreh, lada kani ka bhah thung krehkaam ko namo ym em ha kiwi ki bynta kam ha ki thaw puræ næ du hawa thung kreh.
U MLA na Mawlai, u Process T Sawkmie hawa yieñ wow klam hajrong kani ka phang, da ong u wa nadooh wa yakhun wow yoh ya ka jylla ki Khasi, Jaiñtia wa ki Garo da man ki kawi wow yakhunlang, heiwa da yoh lang leh ya kiwa yahkhmat deiwa pynrap neibynta ka Reservation Policy, ka sorkar da toh wow bichaar sani bha.
U MLA ka AITC na Mawsynram, u HM Shangpliang hawa chimbynta wow klam hajrong kani ka phang, da e yumut u wa hajrong kani ka phang, ka sorkar toh u chna noh ko da ka Committee wow bichaar wei da e yumut hajrong kammon wow pynthymme ya ka Reservation Policy.
U Shangpliang da ong u wa kani ka Policy toh kawa rap phær. Ha kani ka jylla da pynhaap kam ka Scheduled Tribe wa kynthup ya ki Khasi, Jaiñtia wa ki Garo wei rap phær ko neibhah wa ka em ko ka bhah kyrpang hapyrdi yong ki para jaitbru Schedule Tribe.
Da ong u wa hei yong sakhiat ka sorkar jylla toh u pynkrehkaam yaka bhah thungkreh ha ki chnat sorkar pyrdi wa wan krehkaam ha kani ka jylla, heiwa da wanrah bait ki da ki bru kiwa na baar jylla wei ileh wa ka sorkar jylla da chah jem wow leh katwa mon da ki yung krehkaam ka sorkar pyrdi kam ka ICAR.
Hawa yatoh wa ini waroh, u MLA ka NPP na Rongara Siju, u Rakkam A Sangma da pynsñiaw u yei pyrchah joor ya iwon iwon i thmu wow pynkylla ya ka Reservation Policy ka jylla.
U Rakkam da ong wa kani ka phang toh kawa khia wei kawa chit wow yaklam, wei pynsñiaw u wa ymtoh wow kylli yei stat kiwa yahkhmat ki warim wei kamjooh ya kani ka Reservation Policy. Da ong u wa kani toh kawa rap phær wei kawa kyrpang bha kawa kiwa yahkhmat warim da rai ki.
