U Chief Executive Member (CEM) ka Khasi Hills Autonomous District Council (KHADC), u Titosstarwell Chyne ynne ka sngi da wanrah u hapoh ka yung dorbar ya ka KHAD (Village and Town Development Council) Bill, 2021 hajrong i thmu wow ebor ya ki dorbar chnong wow pynkrehkaam ya ki kaam pynroi hapoh ki chnong.
Hawa pynche hajrong ini, u CEM da ong u wa kani ka Bill ebor ko ya ki bor chnong wow pait yei emkaam i roi i paar ha ki chnong ki thaw wei wow wanrah ya ki kaam pynroi.
Da ong u wa i wanrah ya kani ka Bill toh wa ka KHADC ym kwah ko wa ki dorbar chnong u kylla dur næ wow pyntlot ki ya ka riti dustur wa ki Scheme ka sorkar pyrdi, heiwa da ong u leh wa ka sorkar India da phah ko leh wow Upload næ pyntip ki lyngba ka Website ya waroh ki pyrtuid ki chnong cha ka Ministry of Rural Development & Panchayati Raj.
Da ong u leh wa ka 15th Finance Commission leh da booh ko ya ki kyndon wa ki kaam pynroi toh u poi bait ki cha ki paidbah, wei ini da pynman i ya ka Executive Committee hapoh ka KHADC wa emkaam ya kani ka Bill.
U Titos da ong chooh chooh u wa wot ka sorkar jylla da booh ko ya ki Village Employment Council wow pynlai bait ya ka Scheme 100 sngi, heiwa teiñ-teiñ ki VEC takhooh ki wa ki rukom pynlai chnong tangwa lyngba ka KHAD (Village and Town Development Council) Bill, 2021 daw pynlait ko ya ini waroh heiwa ki kaam pynroi u lai bait ki na ka Dorbar Chnong wei ka Council daw pynkhlan chooh chooh ko ya i rukom krehkam ki chnong.
Katkam i ong u CEM, u Chairman ka Village and Town Development Council u man bait da u Rangbah Shnong, katwa ki dkhot wa kynthup ya u Vice Chairman, Secretary wa Treasurer daw jied da kiwa chong chnong kiwa man ki tre chnong wei kiwa da kynjoh palat 18 snem wei ka samoi krehkaam ki Council man ki 5 snem.
