Ynne ka sngi u MLA ka Amlarem, u Lahkmen Rymbui da wanrah u ya kattu katni ki mat ha ka Yung Dorbar Chna-aiñ ka jylla wei da yaroh u leh heiyatoh wa ka mang tangka wa da wanrah u Montri Rangbah ka jylla, u Conrad Sangma.
Da ong u wa ka Amlarem Civil Sub-Division man ko kawa da rim dooh ha ka jylla ya kawa da sdang ha u 1976 kamtæ da kyntu u ya ka sorkar wow pynmiat ya ka ymtoh du neidaw wa man ko ka Headquarter tangwa man ko leh ha pyrdi yong ki thaw uiñke suwari.
Da kyntu u leh wow chna thymme ya ka yung krehkaam (Administrative Complex) kani ka Civil Sub-Division neibhah kat ya ka Election MDC ye u ñiaw Vote ha kani ka yung tangwa ym man ko ka thaw wa biang wow ñiaw ya ka Vote Election MLA.
Da ong u wa neidaw wa em ka Amlarem hapyrdi emkaam ko ya u sarok Ring Road wow pynduna ya i khynñia kari ha sarok.
Da kyntu u leh wow booh ya ka Artificial Turf ha ka Madan Amlarem khnang wow myntoi ki paidbah wei khamtam kiwa boon ki khloor yalehke Football wan ki na thaaiñ War Jaiñtia.
Heiyatoh wa ka umkor da ong u wa emkaam ya ka Master Plan khnang wa ymtoh du ya ka Amlarem tangwa ki chnong ha kylleiñ ka jylla dang heh dang kmai ki tæ deiwa em ka Master Plan daw ye u pyndap yeiwa emkaam ki chnong hadien.
Chooh chooh da kyntu u ya ka sorkar wow pynmiat chooh ya ki thaw uiñke suwari hapoh ka Sub-Division.
Heijooh i por da kyrpaad u ya ka sorkar wow booh ya ki thaw noh-jhep wa paka khnang wow suk hadien habood.
U Lahkmen da ong u leh wa iwa eh wa khor katni toh kiwa chongdai madan neibhah manda sdang ka New Shillong Township kamjooh kiwi ki thaw emkaam u pyrkhat ya ki neibhah ki khih ki na kti haktien wei kiwa duna hei yoh i laa.
Chwa wow pynkut u yei klam da ong u wa da toh i por wow sdang pyrkhat ya ka BEd College ha Kiang Nangbah Government College neibhah ym slem de da yoh ya ka Result HSSLC wei ki khynnah leh daw boon ki wow pyndap pyrtuid.
