Ynne ka sngi da pynman ya ka dorbar mang tangka ka JHADC heiwa u CEM ka Council uwa ksoh leh ya ka chnat Finance, u Thombor Shiwat da wanrah u ya ka mang poisa wow pynlut (Estimate Expenditure) wa T. 205,19,52,500 neibynta u snem 2023-24.
Da ong u wa ha uni u snem da booh wow yoh ya ka poisa (Estimate Receipts) wa T. 172,59,38,400 kawa duna (Deficit) T. 30,60,14,100 na kawa yei u pynmih.
I daw wa joor i lut bar i yoh toh nei pynku ya ka tulop kiwa kreh man-u-snem kamjooh kiwa da chong ngiah, i pynkrehkaam ya ka JHADC Members Pension Act 2019 wa kiwi kiwi.
Chooh chooh da ong u wa chibynta wow pynku ya i yoh poisa ka Council, ka Executive Committee daw pynku ko ya ka dan na ka Taxation Department khamtam na ki mar pohkhyndaw (Major & Minor Minerals) wa na ki kari.
Daw pyndooh noh ya ka chnat Fishery wa Agriculture heiwa waroh kiwa kreh u em noh ki hapoh ka Market Department.
Ha kani ka sngi da wanrah leh ya ka aiñ JHADC (Trading by Non Tribal First Amendment) Rules, 2023.
