Ka Dorbar Chnong Umkiang, da pynsñiaw ko yei sñiawsih hajrong i wym chimkhia ka sorkar wow pynchna ya u sarok NH-6 ha ki thaaiñ Umkiang, East Jaiñtia Hills District nadooh Umkiang, Pyrtakuna, Kuliang, Dona waka ka thaaiñ Narpuh hi waroh kawi.
Da ong leh wa ini wym chimkhia ka sorkar wow phah yaka NHAI wow pynchna ya uni u sarokbah da pynman ko ya kiwa chong chnong khamtam ki khynnah, ki khonboo wow yoh kjut ki neidaw wa hap rin mynsien dei laphooh ha kini ki bnai tlang. Wei ki chnong wa em ha tymbud uni u sarok leh ym ye de ki u pynkhreh yow lehkmen Christmas neibhah wym man de u niam rong ya ki yung ki sem wa joor wa hær laphooh.
Da pyntip leh wa da em kawi ka Company wa tip kam ka Laxmi kawa na Silchar kawa da wan kreh chibet malu mala tangwa da kreh pyndep rukom donhi khlem da pynchna miat kamwa toh u leh. Wei hawa kylli kiwa yahkhmat chnong na ki yei daw wym kreh bha ya uni u sarok, da ong ki wym yoh poisa na ka sorkar.
Kamtæ da ong wa ini wym chimkhia da ka sorkar wei kamjooh leh da ka NHAI wow pynchna ya uni u sarok da pynkthang ya kiwa lai wa wan wa kiwa chong chnong neibhah wot ki pliang leh da hap bait u pynkhooid chwa u baam wa joor sap i laphooh wa mih waroh 24 kynta.
Da pynkut deiwa ong wa lada ka sorkar Meghalaya ym ap ko yeiwa ood ki paidbah neiliang kiwa chong chnong ka thaaiñ Umkiang ym yohsa ki wow mih paidbah cha sarok.
Discussion about this post