Ynne ka sngi ha ka Dorbar Mang Tangka ka JHADC, u MDC ka Liang Pyrchah u Lakhon Biam da kylli u katwon tylli ki karkhana pynmih khyndaw-bilat kiwa bood ya ki kyndon ki NOC wa da booh da ka JHADC hadooh ka 31-12-2021, heiwa u CEM ka Council, u Thombor Shiwat da ong u wa ym em kawi wot leh kawa bood lut ya kini ki kyndon.
Hawa paan ya i pyrtuid kini ki karkhana kiwa ymye wow boon ya kini ki kyndon, u Thombor da jubab u deiwa ong wa waroh ki 8 tylli ki karkhana hapoh Ri-loom Jaiñtia ym em u bood ki ya kini ki kyndon.
U Lakhon da kylli chooh chooh u wa neiyi i daw wa ka Council ym em booh ko ya ka Monitoring Gate ha kini ki karkhana khnang wow tip katwon pynmih wei katwon pynlut ko khnang wow che ka dan wa yoh na kini ki karkhana, yeiwa u Thombor da khana u wa da jooh booh ya ki wei ka sorkar jylla da phah ko da ka chithi wow phah pyndam neibhah wa ka Council ymye ko u booh ya ki.
U Thombor da pynche chooh chooh u wa ha ka NOC da em ki kyndon wow booh ya ki Monitoring Gate tangwa hajrong kayi ka yurim wow booh ya ki yeitæ ym che bha katwa kamtæ ka Council leh da hap pynsangeh noh ko ya kani ka Gate.
Ha iwi tawon wa kylli da u Lakhon ya ki jait NOC wa ki karkhana emkaam u yoh ki na ka Council, yeiwa da khana u Thombor wa emkaam ki 5 tylli ki NOC wei kini kynthup ki ya ka Mining, Prospecting License, Shale, Clay wei wow chna (Setting Up) ya ki karkhana.
