U MP ka All India Trinamool Congress (AITC) na West Bengal uwa man leh uwa yahkhmat ka Trinamool Congress, u Derek O’Brien da klam che u wa ka TMC da kammon kammon leh ym ya krehlang ko waka Bharatiya Janata Party (BJP), deiwa pynrap wa waroh ki seiñ saiñpyrthai ka jylla Meghalaya toh kiwa em ha ka jooh ka thaw thiah wa ka BJP.
U Derek uwa da poi ynne ka sngi ha Shillong da pynlait u yei rwai yalap Election yong ka Meghalaya Pradesh Trinamool Congress (MPTC), wei ha kani ka yalang da emlang leh u President ka Party ha kani ka jylla, u Charles Pynrope wa kiwi kiwa yahkhmat ka Party.
Hawa klam wa ki laad pathai khubor, u Derek O’Brien da ong u wa ka Party toh kawa dang thymme ha kani ka jylla, wei ki paidbah daw sdang sñiawthooh chooh chooh ki ya ka TMC katwa dang lai i por. Da ong u wa ka TMC ka chimkhia ko ya iyi wa thmu ko wow leh neibynta ka jylla Meghalaya, wei pynrap u wa lada ym ye ko wow leh næ pynbiang lut kamwa da thmu tangwa daw pyrchang katwa ye wow leh.
U Derek da ong u leh wa wa ki seiñ saiñpyrthai kiwa synchaar hapoh Meghalaya da em ki ha ka jooh ka thaw thiah wa ka BJP, wei da ong chooh chooh wa kini ki seiñ cha Delhi rwai ki da iwi i rwai katwa cheini won rwai ki da iwi, deiwa e nongmuna u yeiwa da jai hawa wanrah ya ka a CAA.
