Ynne ka sngi kawa man leh ka sngi wa khaddooh yong ka Dorbar Synrai, u Montri Rangbah ka jylla, u Conrad Sangma da kylli u yeiwa da leh ka sorkar MUA wa yahkhmat da ka Congress heiyatoh wa i khang ka NGT yei tih mooyong hapoh ka jylla ha u snem 2014.
Da kylli u wa neiyi i daw wa ka sorkar jylla heitu i por ym ujor ko cha ka Supreme Court (SC) pyrchah ya kani ka hukum hapoh i por wa biang?
Chooh chooh da ong u wa ini pynyoo i wa ka sorkar Congress heitu i por da rem (Fail) ko.
Heijooh i por da ong u wa ka sorkar MDA wa katni da yakhun pyrchah ko ya i rai ka NGT cha ka Supreme Court wei da man i kaam iwa jop heiwa da mih ka hukum ha u Naiynñiaw 2019 wei katni dang pynkhreh wow sdang tih mooyong biang katkam ka juk wa katni (Scientific Mining).
Da ong u leh wa ka rai ka Supreme Court da man ko kawa sahkynmoo neibhah ym du yei mantre ya i thaw tangwa wot ki mar pohkhyndaw leh yoh i yong ki paidbah ka jylla.
