Ki ar ngut ki MLA ka Hill State People’s Democratic Party (HSPDP), u Renikton L Tongkhar wa u Samlin Malngiang, ym em u poi ki cha ka yalang ka Central Executive Committee (CEC) yong ka Party. Katkam ka khubor wa da hær smat da ong wa kini ki ar ngut ki MLA em ki i thmu wow mih noh na ka Party wow yakhun ya ka Election MLA na kiwi ki Party.
Hawa kylli hajrong i wiar kini ki ar ngut ki MLA, u President ka HSPDP u KP Pangniang da ong u wa waroh ar ngut dang man ki yong ka HSPDP, wei i wym poi yong ki cha ka yalang CEC toh neidaw wym ye u kiar.
Hawa kylli, da ong u wa ka Party chaniah ko ha kiwa kitkaam ha ki Constituency wei daw rap tip bha manda kiwa kreh ka Party pyntip ki. Da ong u wa i mih næ psiah Party jooh jia i boonsien, tangwa da ong u leh wa ka ym chah ktah ka Party hadooh kattæ.
Ha iwi i liang, da ong u wa ka Party hadooh katni da em ko kamwa 10 ngut ki kyrtong ki wow yakhun ya ka Election MLA 2023.
Hajrong i ong ki heh won yong ka UDP wa ym sñiaw emkaam ware wow krehlang ha ka RDA, u Pangniang da ong u wow lai du ha kawi ka yatylli man iwa eh, tang wow sdang wow yoh yei bor synchaar du ki Pri-loom man ko kawa emkaam neibhah ki mat man kiwa sariem.
U Pangniang da ong u wa ka HSPDP burom ko ya ka UDP, tangwa boi i duna heini heitai ye wow em tangwa chong ha ki lada kwah ki yei krehlang.
