Jowai : Hadien ka yalang u CM ka jylla ha ka 24 tarik uni u bnai wa ki seiñbhalang hei yatoh wei kaam psiah tooh ki barjylla (influx) cha ka jylla kamjooh wa i pynkrehkaam ya ka National Population Register (NPR) Biometric Enrolment, da yaklam yillu bha khamtam neibynta ki entry wa exit point (ki thaw psiah wa ki thaw mih na ka jylla) wei da dep jied leh ya 41 tylli kam kini ki thaw ki wa da booh ha ki le tylli ki kyrdan ka Phase I, Phase II wa Phase III katkam i emkaam.
Hadien wa da pynbna ya kini ki infiltration point da chem wa ha East Jaintia Hills mih pyrtuid du ka Malidor katwa ki le tylli won kam ka Mooriap, Lakaseiñ wa Umkyrpong ym em ki ha kani ka 41 tylli ki entry/exit point wa da jied da ka sorkar.
Kamwow pynkynmoo ya ini i jied ya ki entry/exit point da leh da ka Committee wa yahkhmat u Addl. DG, S.K. Jain.
Ka seiñ AJYWO da pyrchah joor ko ya ini i wa ym em booh ki ya ki tai ki le tylli ki thaw neibhah ong ko wa ka thaiñ EJH toh ka thaiñ tih mooyong, moochuni wa ki kharkhana pynmih khyndaw bilat kamtæ ka thaiñ Mooriap, Lakasein wa Umkyrpong toh ki thaw wa ki barjylla psiah wei mih ki katwa ngeit cha kani ka thaiñ. Yow yada ya ka EJHD emkaam u em kini ki le tylli ki entry/exit points.
Da pyntip ka seiñ AJYWO wa ha ka katai ka yalang wa u CM ym ye ki bor sorkar u e yei jubab wa biang hei yatoh wa i pyndam ya kini ki le tylli ki entry/exit point.
Ka seiñ AJYWO da ong ko leh wa hadooh ki NOC na ka JHADC yow pynemkaam ya ki tai ki entry/exit point leh da dep wow yoh.
Ka seiñ leh ong ko wa hadien kani ka yachem wa u CM ka seiñ leh da lai yachem ko wa u DC ka EJH u bah W. R. Lyngdoh heiwa da ong wa ya ki pyrtuid ki le tylli ki tai ki entry point wa kynthup ya ka Mooriap, Lakasein wa Umkyrpong da dep phah cha ka sorkar jylla yow em ki deilang wa ki tai ki 41 tylli wa da dep jied ka sorkar.
Kani toh katkaam wa pyntip u ma M.H. Dkhar u president ka AJYWO.
Discussion about this post