Uwi u khynroo uwa na Katigorah, Chachar District ka jylla Assam da chah thaap u hapoh ka lieñsuiñ ka Indigo kawa lai na Mumbai cha Silchar deiwa hiar ha Kolkata ynnin ka sngi.
Ini da jia i ha suiñ wei i Video yong ini wa jia da poor bha i ha Social Media heiwa da beiñ kiwa boon ya uni u bru wa thaap oo kamjooh kiwa em hapoh ka lieñsuiñ heiwa uwi da ong u wa uni u bru em chitom u wei ymtoh wow thaap oo.
Ya uni u khynroo da tip kam u Hussain Ahmed Majumdar (32 snem), uwa kreh ha Mumbai wei dang liwan u cha yung kamwa jooh leh u la soo sien. Heipor wa em hapoh liensuiñ da yoh u ya ka Panic Attack heiwa da tieñ, da yaam, da kiad u wei da yarap ki Air Hostess wow chdooh oo yow pynsuki oo tangwa heini i por da em uwi tawon uwa chong hapoh ka lieñsuiñ uwa da thaap syndet ya u Hussain.
Kani ka Flight 6E 138 da hiar ko ha Kolkata Airport heipor 5:35 i step wei da e kti ya waroh ar ngut ha ki pulit ka NSCBI Airport Police Station wei da pynlait noh ya uni u bru wa thaap hadien wa maham ya oo.
Neiliang ka Indigo Airlines da beiñ ki yeiwa jia wei da pyntikna wa da e kti ya ki ar ngut ha ki pulit ka Kolkata Airport.
Iwa phylla won toh wa u Hussain Ahmed da wiar u na Kolkata Airport wei kiwa ha-yung yong oo da ong ki wa da toh u mih u wow lai won cha Silchar na Kolkata da ka lieñsuiñ.
Kiwa ha-yung u da lai yang ki oo ha Silchar Airport, tangwa ym em poi u Hussain wei ka Mobile u leh man ko kawa da tympleh.
Da paan yarap ki leh na ki paidbah wow pyntip lada em wa yoo næ tip heiwon em u Hussain.
Discussion about this post