Ka Meghalaya da ye ko wow leh bha ynne haka Women’s Senior One Day Trophy tangwa kattæ leh da rem ko haka Tamil Nadu da 6 Wicket ha ka yalehke ka Elite Group E wa pynman ha Chennai.
Hadien wa jop yaka kylla khlem wei da jied wow Bat nyngkong, ka Meghalaya da haap lut ki Wicket ko deiwa kamai 101 na ki 40.3 Over, hanla man i iwa duna leh tangwa iwa bood dooh hadooh ynne ha kani ka lympung.
Hadien wa da yoh ki hapoh 100 Run ha ki le tylli ki yalehke wa da dep, ka Guest Player ka Saee Purandare da ye biang ko wow kamai Run deiwa yoh 53 Run wa kynthup ya 10 tylli ki Boundaries.
Ka Meghalaya daka bol da sdang ko deiwa yoh kyrmen heiwa ha iwi i por da yoh 36/3, tangwa i kamai Run neibynta ka Wicket wa soo iwa 64 Run da pynpoi ko yaka Tamil Nadu wow kynjoh yei jop iwa da poi deiwa dooh 4 Wicket haka 16 Over.
Ka Captain Debasmita Dutta da yoh ko 2/26, katwa ka Guest Player ka Ahireeta Mukherjee da yoh ko 1/17. Ka Daiaka Warjri hawa yang bol da embynta ko wow pynhaap 3 tylli ki Wicket deiwa yoh ar tylli ki Catch wei da pyn Run Out ya kawi.
Ka Meghalaya kattu daw yaleh ko yaka yakhun wa khaddooh pyrchah yaka Himachal Pradesh ha kani ka sgni Bibar.
