I lehbha ka Ajima Sangma da ka bol deiwa yoh 5 Wicket da yarap ko ya ka Meghalaya wow jop da 22 Run ya ka Bihar ha ka Women’s Senior One Day Trophy wa pynman ha Kolkata ynne ka sngi.
Deiwa booh thong 177 Run yow jop, ka Bihar da dooh ko ya ka Wicket pyn haka Over wa nyngkong ha i kti ka Sangma, kawa da pynbood won da ka LBW ha ka Over wa 5 yow pynpoi ya ka Bihar da 8/2.
I neh won ka Wicket wa 3 deiwa kamai 64 Run da e kyrmen ko ya ka Bihar yow jop tangwa ka Luiza Tamang (1/23) waka Pinky Chanda (2/18) da pynhaap ki ya ki arngut kiwa Bat wa pyndik dooh ya ka Meghalaya.
Kiwa kawang bol ka Meghalaya da pteiñ ki wow pynhaap Wicket wei ha iwi i por da poi ka Bihar da 117/8 wei da yoo wa i jop da em i ha kti ka Meghalaya, tangwa ka 32 Run neibynta ka Wicket wa 9 da pyn kop-kop ko ya ka Meghalaya tangwa ka Tamang da ye ko wow pynyoh ya ka Run Out. Ka Sangma kawa da pynneh ya ki Over ko neibynta iwa kut, da wan ko wow pynhaap ya ka Wicket wa khaddooh da ka bol wa khaddooh ka Over wa 46 yow pynkut da 5 Wicket deiwa e 22 Run.
Hachwa ini, ka Meghalaya da jop ko ya ka kylla khlem wei da jied ko wow Bat nyngkong.
Najrong wow yoh u pynhaap smat ya ki Wicket, da ka Bat won ka Tamang da kamai ko 26 waka Neha Hajong 36 iwa yarap ya ka Meghalaya wow kamai palat 5 Run ha ki 10 Over wa nyngkong.
Hadien wa haap ka Tamang, da pynyohlok ya ka Hajong da ka Guest Player ka Rajni Lodhi (50) kawa da yoh ya ka 50 Run wa ar na ki ar tylli ki yalehke. Kini ki arbgut da kamai lang ki 62 Run neibynta ka Wicket wa le.
Ka Captain Debasmita Dutta da kamai ko 17 Run tangwa ka Meghalaya naka 143/3 da haap lut ki Wicket deiwa kamai 176 Run hadooh wa lut ki Over. Ka Dutta da takha ko heipor wa kawang bol iwa da pynartatien wow ye ko u chimbynta de ha kani ka Tournament.
Ka Meghalaya ym yoh ko u chongngiah heiwa pyn mynstep u yachem ko waka Manipur.
