U MDC ka Jowai Central, u Andrew Shullai ynne ka sngi da thoh u cha u Deputy Commissioner ka West Jaiñtia Hills hajrong i thut wow lai kit jhep da ki chnat sorkar na Jowai du hadien wa em kiwa pyrchah ya i noh jhep ha Mynkjai da ka Jowai Municipal Board.
Neiliang u Andrew da pynkynmoo u ya u DC hajrong ka yalang wa da man ha ka 26 Wisu chirup wa ki waheh chnong ka Jowai kiwa da yachem ya u DC kiwa da dawa na ka sorkar wa na u DC wow leh katkam i bor yong ki wow pteiñ i noh jhep ka JMB ha Mynkjai heiwa da kular leh ya ki waheh chnong wa u MDC wow pynbiang ya i thaw noh-jhep iwa thymme.
U Andrew da ong u wa sñiawsih u wow yoo wa wot hadien soo bnai leh ympu yoo ya i thaw noh jhep wa thymme kamwa da kular ha ka yalang.
Da ong u wa man iwa sñiawsih wa ha kylleiñ ka Jowai katni da lang du i jhep wei khamtam hajan ka yung krehkaam u DC, “Mutdur katwon u em i jhep ha yung ki bru,” da ong u Andrew.
Heijooh i por da ong u wa kamwa dang yakhun ya ka khlam COVID-19 emkaam leh wow kyruiñ cha i rukom noh jhep khnang wow lait na iwon iwon i jait kjut wow mih na i jhep.
U Andrew da kdaw u leh ya ka soskular wa da soi hapyrdi ka JHADC wa ka JMB wow e thaw noh jhep ha Mynkjai heiwa kani ka soskular u krehkaam ko hadooh u Naisaphra 2037, deiwa ban wa ki ar liang toh u bood ki ya ki kyndon kani ka soskular kam ka laad wow pynlai bait chwa ya ini i kaam wa katni.
Kamtæ da kyntu u ya ki bor District wa u DC wow chimkhia ya ini katkam i bor wa em ki khnang wa ini i kaam u man i iwa lai bait.
