Jowai: Ka Bei Rym-aw ha kylleiñ ka pyrthai man ko kawa da jæd da pra neidaw wa kwah rhah u bru pyrthai hadooh wa da poi u pood wa da dooh ko yei miatdur yong ka, katni da thooh ya ki laad wow wanrah biang yei miat yong ka wei wow yada ya kiwa em mynsien hajrong yong ka.
Kamtæ ynne ka sngi ye ko u man ka sngi wow sahkynmoo ya ki khon ka Dorbar Tuber Kmaichnong heiwa da ye ki u thung ya ki 4,200 tylli ki tre dieñ ha kylleiñ yong ka chnong.
Ka Dorbar Chnong hapoh i yahkhmat u Waheh Chnong yong ka u Graham Lyngdoh da lai thung ki ya kini ki dieñ nadooh na Khekyllang, Krem Pambru, Tuber Eco Park, Loomsniriang View Point, War Khloo Blai, wa kiwi kiwi ki thaw hapoh u pood u ang ka chnong.
Ki jait dieñ wa da thung kynthup ki ya ki Puma, Champa wa ki Silver Oak ya kiwa da e da ka District Basin Development Unit, East Jaiñtia Hills.
Ha kani ka sngi da yachim bynta chongchit da ki waheh ka chnong, ki khynnah na ki skur wa em hapoh ka chnong, ki manbei manpa wa ki khynroo khyllood wa wan na ki 6 tylli ki dong hapoh ka chnong.
Neiliang u Waheh Chnong u Graham Lyngdoh da ong u wa da pynman ya ini i thung dieñ toh wow pynneh pynsah ya ka Bei-Rymaw wei wow pynsap biang ya ka da ki sula ki that wa yirngam.
Discussion about this post