U Montri wa pait ya ka chnat puræ puthi ka jylla, u Lahkmen Rymbui da ong u wa ki bei ki pa kamjooh kiwa sikai da pynsñiaw wei da ujor wa ki Online Class ym man sakhiat ki kiwa biang ya ki khynnah khamtam kiwa dang khian rta, wei da kyntu ki ya ki bor sorkar wow wai noh ya ki skur deiwa bood ya ki kyndon ka chnat i chait i khiah iwa da pynman i ya ka sorkar wow chim ya i rai wow wai biang ya ki skur tangwa da ong u wa ini dang hap pait bniah wei bichaar da ki Deputy Commissioner, ki SDO Civil wa ki School Managing Committee katkam wa man wa long.
Ka sorkar jylla da pynbna ko wow wai noh ki skur ha ki sor wa palat-sor nadooh mynstep ka 1 tarik heiwa ya ki skur ha sor ya ki Class 1 hadooh Class 5 ye ki wow lai mih cha skur næ ye ki wow pteiñ ya ki Online Class, neibynta ki Class 6 hadooh Class 12 da chah wow wai ya ki thaw puræ wow lai ki cha skur man-ka-sngi, katwa ha ki thaw palat-sor won da chah wow wai nadooh Class 1 hadooh Class 12.
Da ong u leh wa ki khynnah kiwa da palat 18 snem i rta kiwa boon hi dadep chim tika yada COVID-19, da ong u leh wa neibynta ki khynnah wa hapoh ini i rta i pynman skur da man i iwa kongsan tam khamtam wa kiwa boon ki jylla hapoh ka ri da sdang wai skur biang ki.
U Lahkmen da ong u wa neiliang ka sorkar jylla leh da rai ko wow pynman skur noh hadien wa da bichaar ya iwa emkaam ki khynnah, wei heijooh i por ym kyntait u leh wa em i maa wa ye u yabi uni u khñiang ha ki kattu katni bynta.
Chooh chooh da ong u wa lada em iwon iwon i jia na kiwa yoh kjut miat wow khang chwa ya ki skur wei wow wai won hadien deiwa pynrap wa ki paidbah da sñiawthooh ki kammon wow yada neibhah kattu la chi snem chiteiñ da lai ryngkat ki wa kani ka khlam.
