Shillong: Uwa yahkhmat ka Congress uwa man leh ha i jooh i por uwa yahkhmat ka liang pyrchah ha ka jylla, u Dr. Mukul Sangma da ong u wa lada pynkrehkaam mynkna ya ka ILP, kani ka aiñ ym em ko ya ki lamieñ wow ye u yada ya ka jylla na i wan ki bru wa na baar, wei toh hajrong kani ka yurim da chna ya ka MRSSA, wei i chim ya ka rai wow pynkrehkaam ya ka ILP ha kani ka jylla toh neidaw wa i pynman aiñ yong ka sorkar pyrdi ya ka Citizenship Amenment Act (CAA).
Da pynbaad u leh wa ka sorkar jylla ym chimkhia ko ya i rai wa da mynjur hapoh ka yung dorbar chna aiñ ka jylla wow pynkohngooh ya ka sorkar India yow pynkrehkaam ya ka Inner Line Permit (ILP), neibhah hadien wa da dep wow mynjur ha ka dorbar, u Montri Rangbah da kular u wow chimkhia wow pynkohngooh ya ka sorkar India. Da ong u wa hadien wa neiliang ka sorkar da lai ko wow yaklam ya kani ka phang cha Delhi heiwa da phah yang hadien ka Christmas ynnin u snem, tangwa katni da wan poi sa kawi ka Christmas wei chi snem da lai, ka liang pyrchah hap ko wow pynkynmoo wow kyrsu thiah biang ya ka sorkar neidaw ini i thok.
Da ong u wa ki seiñbhalang kiwa yakhih katni, hap ki wow kyrsu thiah ya kani ka sorkar, wei lada ka sorkar ym ye ko wow pynmankaam yaka ILP, pynyoo wa da thok ya ki paidbah hapoh ka yung dorbar chna aiñ.
U Dr. Mukul da ong u leh wa ya ka phang ILP da pynsñiaw da ki seiñbhalang nadooh ki por wa nachwa, na kawi ka sorkar cha kawi ka sorkar, wei ha kitu ki por, ka sorkar ym em e ko yaka ILP, tangwa hanla ym em e ko ya ka ILP ha kitu ki por, neiliang ka sorkar wa da yahkhmat ka Congress da wanrah ko da ki aiñ yong ka hi ha ka jylla yow kdoh u khoom ya ki bru kiwa wan na baar ka jylla, deiwa wanrah ya ka Meghalaya Residents Safety and Security Act (MRSSA). Da ong u wa katwa dang yang yei mynjur na ka sorkar India wow pynkrehkaam ya ka ILP, ileh wa ka sorkar jylla ym pynkrehkaam chwa ya ka MRSSA.
