Jowai: Kam ka dak wow pyrchah yei wym mano ka sorkar jylla hajrong wa dadep e ya ka Dorkhat (Memorandum) ya ki dawa ka seiñ JPWDMW&LU, nadooh 05-09-2018 wa ka chithi pynkynmoo ha ka 14 tarik uni u bnai wei wym jubab ka sorkar yei dawa yong ki, ynne ka sngi da pynman ya ka yalang yong ka seiñ ha Jowai.
Kam wow pynkynmoo heini ki mat dawa ka seiñ toh yei wym su nongsngi ka sorkar la san ynru bnai, iwa kattu da jan wow su noh ya ka bai skur ki khon kiwa kreh Muster Roll. Kamjooh leh ya ka nongsngi heiwa ka sorkar lyngba ka chnat Labour dadep thmu ko u pynku ya ka nongsngi na ka T. 189 cha ka T. 300 chisngi nadooh u Naiynru 2018, neitæ ya i wym pynkrehkaam ki chnat sorkar ya ka Meghalaya Regularisation of Casual Workers Scheme 1996 iwa mut wa ya kitu ki Muster Roll kiwa da kreh chiphaw snem pura u pynman noh ya ki cha ka Regular Casual Workers (RCW). U snem wow chongngiah ki Muster Roll da dawa ka seiñ wow man ko manda dap 60 snem.
Katwa kamtae, ki Muster Roll kiwa kreh ha ki chnat waphær waphær ka sorkar Meghalaya da wan ki na kylleiñ ka ri-loom Jaiñtia cha ka dorbar ynne ka sngi ha Yungwalieh ka Tpep Pale, Jowai.
Ka seiñ ynne hadien wa yaklam yillu hajrong kini waroh da chim ki ya ka rai wow lai paidbah ha ka 30 tarik uni u bnai nadooh 10:00 istep ha Jowai deiwa sdang na Tpep Pale, Jowai.
“Yooluti i wa ka Sorkar Meghalaya u pynkrehkaam noh ko hadien kani ka sngi wow lai paidbah ki Muster Roll” da ong ka seiñ.
Chooh chooh da ong ko wa lada ym bna de ka sorkar neiliang yong ka seiñ daw chim won ko ka rai wow lai cha yung bichar yow paan ya i hok yong ki.
Discussion about this post