U Montri Rangbah ka Mizoram u Zoramthanga da thoh u cha u Montri ki kaam Pohyung ka ri, u Amit Shah wow thung Chief Secretary da uwa tip u klam Mizo hadien wa ka sorkar pyrdi da thung ko da ka Renu Sharma.
U Zoramthanga da ong u wa hadien wa chong ngiah u Chief Secretary warim u Lalnunmawia Chuaugo da kyrpaad u ya u Additional Chief Secretary wa katni u J.C. Ramthanga wow man kam u Chief Secretary wa thymme tangwa ka Home Ministry da thung pathan ko da ka Renu Sharma kam ka Chief Secretary wa thymme.
Da e daw wa kiwa boon ki bru ha Mizoram ym sñiawthooh Hindi ki wei ki Montri sorkar leh ym em sñiawthooh Hindi wei em na ki leh chem chitom ki wow sñiawthooh ya ka English. Kamtæ da ong wa lada ka Chief Secretary ym sñiawthooh ko yei ktien Mizo ym man ko kam ka Chief Secretary kawa biang wow leh yei kaam.
Chooh chooh da kdaw wa na ini i daw ka sorkar India ym jooh em thung Chief Secretary ko da u wym tip u klam Mizo nadooh wa chna ya ka jylla Mizo hanla synchaar ya ka ri da ka sorkar UPA lane daka NDA wei ini da man i kam i rukom iwa da myllien.
U Montri Rangbah ka Mizoram da ong u wa da man chi lok waka NDA nadooh wa sdang hadooh katni hanla kiwi ki jylla da chaad ki chibet chawi chawi tangwa oo da neh bait u waka NDA hadooh katni kamtæ da sñiaw wa em hok wow pyrkhat yeini i dawa kam kiwa chi lok ka NDA.
Da kdaw leh wa heipor u Montri Rangbah warim uwa na ka Congress da yoh u ya u Chief Secretary katkam wa paan tangwa lada katni won ym yoh daw chah rkhai beiñ ha ka Congress Party iwa daw dai sarom ya oo uwa man kam u lok ka NDA, kamtæ da kyrpaad wow pynkylla noh ya ka hukum.
