Ynne ka sngi da pynman ya ka yalang pynche paidbah hajrong i dawa pynpsiah ya ka ktien Khasi hapoh ka Khyrnit wa Phra ka Riti Shynchaar ka ri India wada pynman ha Jowai da ka seiñ Khasi Authors’ Society, chirup i ksohkti lang ki seiñbhalang, ki bru waheh wasian wa kiwa sikai ki khynroo khyllood.
Neiliang u President ka Khasi Authors’ Society – Seiñbei, u Dr. L. Nonglait da ong u wa i daw wa duna ki khynroo khyllood napoh ka jylla Meghalaya kiwa pass ya ka Exam IAS toh wym em yoh ki ka laad u thoh exam hei ktien Khasi, katwa ha kiwi won ki jylla yoh laad u thoh hei ktien yongki hi neipor cheipor tæ yoh ki ya ki IAS Officer.
Da ong u ki jylla wa yoh u thoh Exam ki hei ktien yongki hi toh wa ya ka ktien yong ki da tipmit hapoh ka Khyrnit wa Phra ka Riti Synchaar ka ri.
Kamtæ neiliang ka Khasi Authors’ Society leh da mih ma mih ko chakhmat wow dawa la boon snem toh wa sñiawthooh ya chiboon i myntoi wa ki paidbah ka jylla ye ki u yoh lada tipmit ka ktien Khasi wei wow man kam ka Official Language.
Da kdaw u kattu katni ki myntoi, wa lada man Official Language ka ktien Khasi, ki yung krehkaam sorkar leh u hap pynemkaam ki dei ktien Khasi hawa pynmih kiwon kiwon ki Form, ki chithi wei ki paidbah leh u thoh chithi ki dei Khasi, wa kamwa man katni da pynemkaam i du da i ktien English.
Chooh chooh da kdaw u hawa yakhun Exam MPSC næ DSC leh daw yoh laad u thoh dei ktien Khasi, wei kamwa man katni wot ya ki post wakhian tam wa hap yakhun da kiwa rap khian kyrdan puræ leh hap ki u thoh dei English heiwa da chem chitom ki.
Heijooh i por wot ha ki thaw puræ ki skur leh ya kiwon kiwon ki subject lada toh ka science, social science, geography wa kiwi u yoh puræ dei ktien Khasi daw man i wow yarap bha ya ki khynnah skur u sñawthooh ki yei yumut ka subject manda pynkylla cha ka ktien Khasi.
Hawa kdaw ya chiboon i dooh nong ka Jylla kamjooh ki khynroo khyllood wa puræ nei wym yoh i tipmit ka Ktien Khasi, u Dr. L. Nonglait da khut u i yakrehlang yong waroh ki paidbah nadooh kiwa yahkhmat waphær waphær, kiwa mihkhmat paidbah yow pynman kam yeini i dawa neibhah ymtoh du i dawa ka Khasi Authors’ Society tangwa yong ka jaitbru Ynñiawtrep waroh kawi.
Heijooh i por da khana u yei daw wa hap pynman dei mih sarok lai pynche kylleiñ ki thaw, toh wym em uwi wot leh u MLA wa wanrah ki mat yaklam ya ka hapoh ka ka Dorbar Tlang wa dadep neibynta u pynman ktien sorkar ya ka ktien Khasi wot hawa da dep e chithi pynkynmoo ki cha u CM ka sorkar jylla ha u bnai October 2025 wei da e leh cha waroh ki 35 ngut ki MLA Khasi Jaiñtia.
Kiwi won wa e i klam yow kyrchaan yeini i dawa ka Khasi Authors’ Society kynthup ki ya ka Soloni Bareh EC member Khasi Authors’ Society – Chnat Jowai, u Laitphar Synrem President – KSU West Jaiñtia Hills District, u Nielkee – Mukhim General Secretary JSU, u Yoodahun Shylla – President HYC War Jaintia, u Nangkhrawbor Rani – General Secretary FKJGP wa kiwi.
Discussion about this post