Ha iwi i jia wa phylla, uwi uwa lai puræ BA wa em 24 snem i rta uwa tip kam u Ujjwal Rana na ka DAV PG Degree College ha Budhana, Uttar Pradesh da pynkut u yei mynsien yong oo deiwa thang u pyn ya oo hi ynnin ka sngi.
Yeini da leh u Ujjwal hadien wa chah kyntait u wow thoh Exam neidaw wa dang sah ka bai College u sa Rs. 7,000.
U Ujjwal toh uwa puræ 2nd Year BA wei da chah pyndik wei chah lehbeiñ u haki bor pynlai ka College neidaw wa klam pyrchah yei leh ki ya kiwa lai puræ kiwa dang sah ka bai Tution ki.
Chwa ini, u Ujjwal da riñ u dei Video wei da thoh u leh ka chithi wa pynbaad u ya u Principal, u Pradeep Kumar wa dat wei klam khlemakor u oo.
U Ujjwal da paan yarap u leh na ki pulit tangwa ki da kyrchaan ki ya ki bor ka College iwa da pynbor ya oo wow leh yeini.
Neiliang u Principal ka DAV College, da pynche u wa uni u khynnah dang dep su u du Rs. 1,750 na ka bai College wei ym jooh chong Class u.
U Pradeep da kam u leh wa u Ujjwal da em u ka Mobile Phone wa chongdor Rs. 25,000 wei joh wan College u da ka thuk-thuk kawa baam phñiang wei kawa chongdor Rs. 1 lak. Kammon ye u kam wa toh u khian paaid næ u Dalit? Lada ym ye sakhiat u wow su, ka sorkar em ko ya ki Scholarships neibynta ki khynnah.
“Lada toh uwa dooh weileh ym pyndap u ya ka Scholarship Form?” Da kylli u Pradeep.
Discussion about this post