Jowai : Ka yalehe ynnin ka sngi ha ka Umlyngsha Inter Dong Football League kawa pynman da ka “Umlyngsha Youth Society & Sports Club, East Jaiñtia Hills da man ko kawa ya drawn ha pyn ar ki yalehke.
Ha ka yalehke wa nyngkong heipor 1 waje i sngi ha pyrdi ka Dong Main Road FC pyrchah ya ka Dong East Colony FC da man ko kawa yoosuk bha wei pynchongchit ko ya kiwa paitke, ka Dong Main Road FC da yoh chwa ko u thap chi kool ha ka minit wa 6 heiwa yakhmat u Toni Talang katwa ka Dong East han la chah thap ko leh ym em kheiñ stiñ ko dei wa kreh chitom ko wei da yoh ko u su hachwa u kut ka minit yalehke ha ka minit wa 55 heiwa da thap da u Rimiki Suchen.
Ha ka yalehke wa ar won heipor 2:30 nohchariñ ha pyrdi ka Dong Pyrdi wa ka Dong Khadlynraw da man ko kawa khlem em wa thap kool hadooh wa kut ka minit yalehke.
Kani toh ka khubor wa da pyllait da U WT Syrti, President ka UYSSC, East Jaiñtia Hills.
Discussion about this post