Heiyatoh wa i pynbait pood hapyrdi ka Assam wa Meghalaya, u Montri Rangbah ka jylla, u Conrad Sangma da pyntip u wa ynne ka sngi da em ka yalang wa emlang u Symbood Montri Rangbah ka jylla u Prestone Tynsong wa u Pijush Hazarika, u Montri ka sorkar Assam uwa man leh u Chairman ka Regional Committee na Assam.
Hadien wa da dep wow yaklam bniah ya iwa emkaam, da ya e mar kylliang ya ki bui (Report) wa da pyndep da ki ar Committee iwa mut wa ka sorkar Assam da em ko ya ka Report wa da leh daka Assam katwa ka Meghalaya da em ko ya ka Report wa da leh da ka Assam.
U Conrad da pyntip u leh wa da dep wow puræ ya ka Report wei da yaklam bniah biang sa chisien wei da man ko ka yaklam kawa miat wa bha tangwa ym pu ye wow khana bniah ya iwa da yaklam neibhah daw yachem biang sa chisien para Montri Rangbah wei hadien kani daw chim ya ka rai wa khaddooh.
Ya ini waroh da yooluti u Conrad wow pyndep ha kini ki tayaw wa daw wan.
Da pyntip u leh wa mynstep ka Committee yong ka Kamrup waka West Khasi Hills daw yachem ki ha Guwahati heiwa ya ka Meghalaya daw yahkhmat da u Renikton Lyngdoh Tongkhar, Montri ka chnat PHE yow yaklam ya ki bynta khappood wa pait ki.
Katwa heiyatoh waka Regional Committee ka East Jaiñtia Hills, da pyntip wa ym pu em dep ki wow phah ya ka Report tangwa da pyntip ki yei long i man ki thaw khappood wa da pynbait ki.
