U kyrtong ka TMC na 2-Jowai Constituency, u Awhai Andrew Shullai hawa wan wow yatai ñia wei wow pynchong yurim ha ka rynsan yalap Election wa da pynman da ka Dorbar Chnong Khimusniang, Jowai kawa tip kam ka Common Platform Election Campaign ha ka 9 tarik heiwa da emlang waroh kiwi ki kyrtong ka 2-Jowai Constituency wa kynthup ya u kyrtong ka UDP u Moonlight Pariat, u kyrtong ka BJP u Allan K Suchiang, u kyrtong ka NPP u Wailadmiki Shylla wa u kyrtong ka Congress u Daniel Dan da ong u wa da yoo kulmar u pait yei man ka saiñhima sima hapoh ka jylla yong i.
Da ong u wa ka Meghalaya kawa ku bha ha ki liang puræ puthi katni da hap kiwa sikai skur wow thiah miet cha sarok yow yoh tulop.
Da ong u leh wa da ieh mylliñ ya ki kaam i chait i khiah, heiwa kani ka sorkar MDA hawa kylli katwon pynlut ki neibynta u COVID da jubab ki T. 816 klur, wei da pynlut du T. 50 klur donhi yow chna ya ki thaw sumaar wei wow booh ya ki tiar ki tar katwa kawa sah won T. 700 klur tam ym tip cheiwon pynkut ki ka.
“Ha kini ki san snem ki MLA ka UDP wa NPP da pyrkhat donhi kammon wow pynlai tooh ya u mooyong, kammon wow booh ya ka thaw yakhle hawa ki dong ki chong da booh kyndon ki nadooh nachwa wym chah wow yakhle,” da ong u Andrew.
Da kdaw u leh yei wym em yoh yarap ki warep kiwa da chah ktah ha ki bor rymaw ki wym em yoh chi naya leh na ka sorkar MDA.
Da ong u wa kamai kajih, i yoh kaam yoh jaam toh kawa da hiar bha nadooh kiwa yaleh kreh DSC ki wym ye u pyndap hanla emboon bha ki kreh kiwa lait wei ki kreh LD kiwa da yaleh nadooh u 2021 ym mih Result hadooh katni hadooh wa da heh rta kiwa yaleh kreh.
Da ong u wa ini toh iwa ktah bha ya ki manbei manpa kiwa da pynlut poisa kiwa da chim da ka ram yow lai phah puræ puthi ya ki khon heiwa oo leh toh uwa da chim da ka ram wow lai puræ.
Chooh chooh da kdaw u wa boon ki wakreh da thung hapoh ka Maternity & Children Hospital kiwa phah pyrtuid da ki Montri sorkar tangwa da kylli u katwon ngut kiwa na ka Jowai Constituency kiwa yoh wei lada oo yoh u man MLA ym em laad u ya kam ini hanla toh i kreh wa khian leh.
Heiyatoh waka Special Rural Work Program (SRWP) kawa toh yow pynchna ya ki luti ki syngkieñ, ki Hall wa kiwi de, da pynman poisa lai yaaw donhi ka T. 1000 samen deiwa saam Cheque kylleiñ kylleiñ hadooh ki wakreh sorkar leh da yoh ki ya kani ka Cheque hapoh ka Constituency.
“Ym phær lada e yarap tangwa toh u e yarap ya ka yung wa emkaam yarap tangwa ym tip neiyi i daw wa da e ya kani ka poisa lada yow chna yung namo u chna dukan wei da man noh ko kam ka poisa lai yaaw,” da ong u Andrew.
Da ong u leh wa sñiaw sarom u ap ya ka yalap Election hapoh ka Constituency kiwa da ong bait ale cha i katwon u e ya phi kawa da man katni ka Business Constituency.
Heiyatoh wa i jhep da ong u wa u Montri ka chnat Pynroi Sor da ong u wa ham yaleh Politics yei jhep lada kwah phi wan yaleh wa i, “Nga da yieñ O wow yaleh pyrchah ya ini,” da ong u Andrew.
Da ong u leh wa neiliang yong oo da khut u ya ka yalang wa ki waheh chnong waroh hadien wa mih i pyrchah yei noh jhep ha Mynkjai dep tæ lai yah u ki ha u DC deiwa ong pynkhooid noh yei jhep dep tæ paanmaap yow lait kani ka kaam u heh yaaw, yow pynbait smat yeini i kaam yow yoh biang u noh jhep tangwa ym em leh yeini heiwa da chim ya ka rai wow thooh thaw noh chawi.
“Hadien ini kat cha wa thooh thaw leh ym yoh de, nga yieñ O heini yow yada yei hok yong phi, neibynta ka mynried yong phi,” da ong u Andrew.
Da ong u leh ym kular u wow pyndep ya ka Iawmusiang, ka B.Ed College, ka MCH neibhah kini toh ki kaamram yong oo kiwa em hakhmat dooh wei u pynlait por u chisien chi tayaaw ya kiwon kiwon ki kaam wa emkaam ki paidbah u yaklam nadooh ki kaam yong samen wa ki kaam yong chnong.
