Ya ki kaam wa bha ym jooh em wa yaroh: Sniawbhalang

U Symbood Montri Rangbah ka sorkar jylla u Sñiawbhalang Dhar ynne ka sngi hawa klam haka yalang booh mooyurim neibynta u chna yaka 30 Bedded Integrated AYUSH Hospital ha Mookyndur, da pynsñiaw u ya ki kaam wa bha ka sorkar MDA ha ki 6 snem hapoh i yahkhmat u Conrad Sangma kam u Montri Rangbah, neitæ da kyruiñ haroh u hajrong i chah pynbaad ka sorkar ha kiwa boon rukom.

Hajrong i chah pynbaad, ong u kam kiwa mihkhmat paidbah wym em sñiawpher ki tangwa nang yoh mynsien chooh chooh ki wow kreh yei kaam, neibhah sñiawthooh che ki wa yow lait nei chah pynbaad toh du lada yoh da ka sorkar kawa thiahsngi donhi. 

“Ya ki kaam wa bha ym jooh em wa yaroh, tangwa yei duna i bakla won smat ki wow kynthah, hanla kattæ leh pdiang i waroh ar neibhah i yieñ i neibynta u chakri yaka jylla”.

Ong u leh wa em kiwi won ki seiñ saiñ hima sima næ wot ki para wa mihkhmat lang leh yah bakla wei pynsñiawthooh bakla ki yow paidbah, deiwa e nongmuna u heiyatoh iwa jubab u Montri Rangbah hapoh yung dorbar ini wa dep neibynta ka Smart Town wa da mang Rs. 338 klur ha Tura katwa ha Jowai won Rs. 79 klur.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Da pynrap u wa ka sorkar ymtoh kawa leh chilang tangwa pait ko katkam wa emkaam u paidbah, wei lada kheiñ nei em ki MLA leh ka Garo em ko 24 ngut katwa ka Jaiñtia won 7 ngut.

Hajrong i pynbaad wa ong wa ka sorkar chim ram ko man-ka-sngi, u Sñiawbhalang da yaleh u wow pynche deiwa ong, ka sorkar wym jooh leh kulmar ko tangwa lai ko katkam ki aiñ ki kyndon wa da booh ka sorkar bei.

“Em ki para wa mihkhmat leh kiwa pynsñiawthooh bakla ya ki paidbah wot yei wym tip ki leh ak ki kam kiwa tip,” ong u Sñiawbhalang Dhar.

Ha kani ka sngi u Symbood Montri Rangbah da khana haroh u wa hadien wa da chimkti u kam u Urban Minister ha ki khajak snem, ka mang tangka 2024-25 toh kawa pynkmen tam neibhah wa da ye u pynman kaam yeiwa angnood iwa yooluti wa da slem, itæ toh du neibynta ka New Shillong Township da mang ym duna Rs. 5000 klur iwa yatoh neibynta wow chna boon jait yow wanrah yei roi i paar du hapoh ka chat Urban Development.

Pyntip haroh u wa daw chna noh yaka Secretariat wa thymme ha Umsawli khnang yow ye pynduna i khynnia ka sor Shillong, wei kamjooh yow suk ki paidbah wa lai wa wan.