Shillong: U Symbood Montri Rangbah ka jylla, u Prestone Tynsong da ong u wa ye wow man wa i pynchit yaphær jaitbru da pynkhai im biang ko ya iwa jia ha Ichamati kawa ye u man leh toh i thmu wow chim kabu saiñpyrthai yong uyi re uyi, tangwa ka sorkar ym em chongngiah wei daw tih bniah ya ini i kaam, wei lada chem ya uwon uwon daw thap bait cha tharu, lada man kiwa na West Bengal næ na Meghalaya. Ya ini u Montri da ong u hawa kylli hajrong i pteiñ wow pynhær ya ki khubor hamsaia ha ki Social Media wa em i lehbeiñ ya ki Bengali kiwa em ha kani ka jylla.
U Prestone da ong u wa ka phang Ichamati kawa em hapoh ka jylla Meghalaya ym toh u pynchit da kiwa na baar jylla, wei wow pynbait ya ini i ya sñiawthooh bakla ym toh cha Kolkata, wei lada em iyi iyi, toh u wan pynsñiaw cha ka sorkar Meghalaya, ym toh wow pynchit na baar yong ka jylla, heiwa da pyntip u leh wa ka sorkar ka da chimkhia bha ko hajrong kani ka phang khnang wym ktah ko ya kiwa chong chnong ka Meghalaya ki wakreh wa kiwa puræ ha West Bengal.
Da ong u wa ka sorkar nadooh wa sdang da kyrpaad ko ya kiwa chong chnong, kiwa na baar ka jylla wym toh u e diñ ki næ pynkhai im biang ya iwa jia ha Ichamati, deiwa ong wa ka sorkar em ko wei ka tip ko kammon wow leh yow pyntikna wa waroh kiwa chong chnong chong chngaaiñ ki la man ki ki tre chnong næ kiwi ki jaitbru. Da pyntip u wa neiliang u Montri Rangbah ka jylla, u Conrad K Sangma da yaklam u leh wa u Montri Kaam Pohyung ka West Bengal hajrong kani ka phang.
U Prestone da ong u wa kitu ki bru kiwa thmu wow yahbakla lyngba i jia ha Ichamati toh u sangeh ki chi syndon, deiwa pynrap wa ka sorkar ka chim ko yei kitkhlieh wei ym toh u ap ya ka khubor wa rah ki khlieñ ki lat’ab, katwa iwa sakhiat hapoh ka jylla ym em ko kamwa da pynbaad.
Hawa yatoh wa i e Trading License cha ki bar jylla, u Prestone da pyntip u wa da dep wow khut ya ka KHADC wow phah ya ka wa kiwa toh hok wow e ka Council ym toh wow pyndooh wei hap wow lai lyngba ka kyndon wa da booh ha ka Sixth Schedule.
