Ya mih yonglang ki paidbah wow pynkhooid ya ki thaw ki bhaw wa ki yaaw ki haat ka chnong Jowai

Kam chibynta i khooid i jngiar namo ka Swacchata Hi Seva hajrong ka phang “Swachhata Mein Sahbhag, Swachh Bharat, Viksit Bharat.” iwa mut wa i khooid i jngiar ymtoh du i kaamram yong ka sorkar tangwa yong uwi pa uwi wa chong chnong, kamtæ ynne ka sngi kawa man leh ka sngikha u Mahatma Gandhi, ki paidbah da ksohktilang ki wow pynkhooid ya ki chnong ki thaw wa ki thaw paidbah.

Ha chnong Jowai leh da sakhi yei mih ki paidbah wow pynkhooid ya jar jiar ki chnong ki thaw kamjooh ki yaaw ki haat kam ha Yaawthymme, Yaawchyiap, Yaawchor, Yaaw Seiñraij wa kiwi.

Heini i pynkhooid yaaw da yakrehlang nadooh ka chnat Municipal Board, ka dorbar chnong Tympang Iawmusiang, ki Committee wa pait ya ki yaaw waphær waphær wei chwa u sdang i pynkhooid da em ka yalang tbian yow pynsñiawthooh hajrong i khooid i jngiar wa da emlang ki waheh chnong waphær ka chnong Jowai, ki khynnah Scouts and Guides, ki paidbah wa chong yaaw wa kiwi.

Hawa kyntu ya ki paidbah u ya ksohktilang, ka D.V. Lyngdoh, Additional Deputy Commissioner kawa man leh ka CEO ka Jowai Municipal Board, da pynsñiaw ko ya ki yurim wa emkaam yong ka Swachhata Hi Seva wei ya ksohktilang yow pynneh yei khooid ha ki thaw paidbah.

Ong haroh ko wa nadooh ka 17 tarik  u bnai September hadooh ka 17 tarik u Bnai October, 2026, u rap kyruiñ cha ki thaw wa pynman yaaw, ki thaw uiñke suwari wa kiwi de ki thaw paidbah.

Chooh chooh da klam ko hajrong ka Solid Waste Management 2026 deiwa ong wa emkaam u pynbhah yei jhep pyn na yung chwa u noh ha ki borti pynlang jhep waphær waphær.

Pyntip haroh ko wa ka Jowai Municipal Board da dep jied ko kattu katni ki thaw wow pynkhooid kam chibynta u pynsñiawthooh yei emkaam yei kitkhlieh heiyatoh i khooid i jngiar.

Wei neini chakhmat daw pynman chooh chooh i pynkhooid wa i pynsñiawthooh hajrong kammon u pynyapher yei jhep wei wow pynneh yei khooid.

U  P. Lyngdoh, Chairman Jowai Municipal Board, da yamkhmat u yei kyntien kular wow ya ksohktilang u pynneh yei khooid ki yaaw ki haat wa ki thaw wa marjan ka Jowai.

Neiliang won u Dolloi ka Elaka Jowai, u Puramon Kynjing, da ban joor u hajrong i emkaam u pynneh yei khooid wa ki rukom im wa em i kitkhlieh ya ka imlang sahlang.