I roi ki ksaw sarok ha kylleiñ ka Jowai da booh i hei tieñsar ya kiwa boon khamtam ki khynnah wei ha ki bnai wa dadep wot ka Supreme Court leh da pynmih ko boon ki hukum heiyatoh wa kammon u leh ya ki.
Heiyatoh wa ini ka chnat i chait i khiah ka West Jaiñtia Hills chirup wa ka Just Be Friendly (JBF) da pynman ki ya i e dawai Rabies ya ki ksaw sarok ha talawiar ka sor Jowai iwa da wanrah yei kmen hapyrdi kiwa boon wa lang.
Ya ini i e dawai Rabies da sdang nadooh ka 28 tarik u September hadooh ka 1 tarik uni u bnai hapoh i yahkhmat u Dr. BK Chyne Nongrum, Medical and Health Officer, Public Health, Jowai deilang wa uwa sdang ya ka seiñ Just Be Friendly (JBF), u Dr. Sashanka Sekhar Dutta na Guwahati, u Vishal uwa man u Officer ka JBF wa ka Dr. KL Passah.
Hawa yaklam wa u Vishal da ong u wa da ye u e dawai ym du ya ki ksaw sarok tangwa wot ki ksaw wa ri ki bru deiwa kyntu wa lada em kiwa chah dait emkaam wow lai ki cha ki thaw sumaar.
Hawa pynkut ya ini i e dawai Rabies ya ki ksaw sarok ha Jowai, ka Dr. Passah da ong ko wa da embynta ko wa ka JBF da boon tylli ki snem wei da kyrpaad ko ya ki wow wan cha Jowai wow e dawai ya ki ksaw heiwa da emlang ko wa ki ha waroh ki soo sngi.
Da pyntip ko wa da ye u e dawai hadooh 80% ki ksaw wei daw pteiñ biang wow wan e dawai ha ki bnai wow wan heiwa da e khublei ko leh ya ki waheh chnong kamjooh ki paidbah kiwa da kyrchaan wei e mynsien ya ki ha kini ki soo sngi.
Discussion about this post