Shillong: U Banteidor Lyngdoh, u montri ka chnat Agriculture, ynnin ka sngi da hiar u cha ka chnong Nongkasen wow ya phyllu yumut wa kiwa yahkhmat ki 26 tylli ki chnong deilang wa ki warep hajrong kammon wow pynlai yaw ya u piskot, u mar rep wa kongsan naka thaaiñ, uwa da toh i por wow khait wow pynlai yaw.
Tangwa neidaw ka Lockdown wow yakhun pyrchah yaka khlam COVID-19 wa i wym pu chah u lai u wan na kawi ka District cha kawi won, da booh yei eh wei pynsah umdoom ya ki warep ka thaaiñ. Ya ka yalang da pynman ha Hall ka St. Joseph’s Higher Secondary School, Nongkasen kawa haap ha Mawthadraishan Constituency.
Ya kani ka yalang da pynbait pynbiang da ki bru rangbah ka thaaiñ kiwa haka tayaw wa da dep hi ki da lai ki wow pynsñiaw yei eh ha u montri uwa khlem kyntait wow hiar cha kani ka chnong wow yoh ya phyllu yumut wa ki warep ha katai ka sngi.
U Banteidor hei klam yong oo da ong u, “Kiwa khayi ki wow thied ya u mar rep yong phi da em chwa wei chong ha phi kattu wow ya pynbait wa kiwa yahkhmat chnong ki bru rangbah wow booh kawi ka Collection Centre khnang wa kiwa khayi u wan thied ki ya u mar rep yong phi.”
Da ong u wa da dep pynman yaka yalang ya phyllu yumut wa ki sahep ka chnat Agriculture kamjooh ka Horticulture wow pyndooh yei eh. “Ka Sorkar da wai ko yaki yaw dailang (regulated market) wei ka chnat leh da e ko yaki Vehicle Pass yaki warep wow pynlai yaw yaki mar rep yong ki heiwa ym em de i chah ah næ ksih beiñ ya i dor ki mar rep.”
Da ong u wa ka West Khasi Hills ka emkaam ko ya kawi ka yaw dailang deiwa kyntu ya ki warep wow ya krehlang wow ya tylli deiwa ong, “Nga yoh sñiaw O na kiwi kiwa e yei klam wa ha chwa yong ka Lockdown, kiwa khayi na baar jylla da wan ki wow thied ya uni u mar rep wei da pynpsiah kari ki hadooh kpær yong phi wow ksih dor “.
“Nga ym sñiaw yahap O ya ini wei i da toh i wow pynkylla ya i rukom ya dai ya thied. I tip i wa uni u mar rep lai bha u cha ka jylla Assam wei ka khayi pateiñ waka ri Bangladesh da lai ko chakhmat wei kiwa khayi mar rep daw wan chim ki ya u mar rep yong phi wow pynpoi cha ri Bangladesh leh”, da ong chooh chooh u montri.
Kiwi kiwa emlang ha ka yalang kynthup ki ya u B Syiem, Director ka chnat Agriculture, DAO ka West Khasi Hills, u K Wahlang, u DHO ka West Khasi Hills, u W Marbaniang, u BDO ka Mawthadraishan C&RD Block, u WB Marbaniang, u Rev Fr R Lyngdoh, Parish Priest Nongkasen Parish wa kiwi kiwi de ki bru rangbah waki manbei ki chnong waphær waphær.
