Shillong: U Chairman ka Confederation of Meghalaya Social Organsations (CoMSO), u Robertjune Kharjahrin da ong u wa i dawa pynkrehkaam da ka Inner Line Permit (ILP) na ka Bengal Eastern Frontier Regulations (BEFR), 1873 daw wanrah ko ar tylli ki myntoi kitæ wow pyllait ya ka jylla Meghalaya na ki poiwiar na i pynkrehkaam ya ka Citizenship Amendment Act (CAA), 2019 wa na i wan psiah ki mynder.
Ya ini da ong u hadien i wan yachem ya u montri rangbah ka jylla Meghalaya, u Conrad K Sangma, ha yung sah u u ha ka janmiet sngi Bibar.
U Kharjahrin da pyntip u wa u montri rangbah da batai u hajrong i yachem ya u Amit Shah ha ka step ka 14 tarik, wei da pyntip u wa i yachem man ko kawa mihsoh bha tangwa em ki kattu katni kiyi kiyi kiwa ka chnat Home Affairs ka sorkar India daw hap ko wow puræ bniah, wei ka sorkar jylla Meghalaya ym pu e ko yaka Government Resolution wa da mynjur da ka yung dorbar chna aiñ ka jylla Meghalaya wa kwah wow pynkrehkaam ya ka ILP lyngba ka BEFR, 1873.
Ki dkhot ka CoMSO ynne ka sngi da yachem ki wa ki MLA na ka seiñ Congress kiwa em ha ka liang pyrchah ha ka jylla wow kyntu ya ki wow kyrchaan ya ka Inner Line Permit yow krehkaam noh ko ha kani ka jylla.
U Kharjahrin da ong u wa man ko kawa emkaam wow yoh noh ya ka ILP ha ka jylla neibhah daw kdooh daw khoom ko yei wan ki mynder nei em ka Citizenship Amendment Act, 2019.
Da ong u wa lada pynkrehkaam yaka ILP, ka CAA ym ktah de ko yaka jylla neibhah i thmu yong ka CAA toh wow pynman chong chnong ya ki nong Bangladesh kiwa da em chwa, wei yeini daw ye u khang da ka ILP.
Ha i jooh i por da pynsñiaw u wa i yachem wa ki MLA ka Congress man ko kawa mihsoh wa kawa sñiawsuk neibhah ki da e ki yei kyrchaan ya ka ILP, wei da pyntip u leh wa u Dr. Mukul Sangma leh da ong u wa emkaam ILP ha kani ka jylla.
Discussion about this post