U Symbood Montri Rangbah yong ka sorkar jylla u Prestone Tynsong da kular u wow pyrchang katwa ye wow e yarap ya ki warep hajrong i yap yong ki sniang neidaw i kjut wa suba toh ka African Swine Fever (ASF).
U Tynsong da kular u ya ini hawa lai yachem ka Hill Farmers Union (HFU) ha ka kamra krehkaam yong oo ynne ka sngi.
Ka HFU hapoh i yahkhmat yong u Commander Shangpliang kam u President, u Alfondbirth Kharsyntiew kam u General Secretary, u Dr. Bremly WB Lyngdoh Adviser deilang wa kiwi won kiwa yahkhmat yong ka HFU na kylleiñ ka jylla da yachem ki ya u Prestone wei da dawa ki leh wow su bai lutsan hajrong i yap yong ki sniang, wei wow e yada hajrong i yap yong ki syiar wei kamjooh leh wow pynbiang ya iwa emkaam kam i baam sniang wa ki Doctor neibynta wow pynmih soh ya ka Piggery Mission.
Hajrong i yap yong ki sniang u Tynsong da pyntip u wa ym ye wow e yarap lada yap hi ki lait noh neiwa pynyap da ki tre wow yada nei poor kjut. Tangwa ka seiñ HFU da ban joor ko wa toh u e yarap bait.
Kamtæ u Tynsong da phah u ya ki sahep yong ka Veterinary Department kiwa ya emlang ha kani ka yachem lang wow lum yutip ki na ka jylla waroh kawi katwon tylli ki sniang kiwa da yap wei ka sorkar daw thooh laad ko wow e yarap katwa ye da ki khon sniang lada ym ye wow yarap da ka poisa.
Hajrong i yap ki syiar, da pyntip u wa da khut yaka yalang wow ya pyrkhat hajrong ini khnang wow e yada. Da phah u leh ya ki sahep wow ya krehlang wa ka HFU neibynta wow pynkrehkaam yaka Piggery Mission lyngba ki Cooperative Society wei da phah u leh wow pynsmat wow Register ya kiwon kiwon ki Society kiwa kwah wow chim yaka Scheme ri sniang.
Neiliang yong u President ka HFU da e khublei u ya u Prestone hajrong ini i dawa yong ka seiñ wei da ong u leh wa ka seiñ smat ko wow ya krehlang wa ka sorkar neibynta kiwon kiwon ki kaam wa e myntoi ya ki warep.