Ka seiñ JSU seiñbei ynne da yoh ko wow yachem ya u Montri Rangbah ka jylla, u Conrad K Sangma wa ya u Symbood Montri Rangbah, u Sniawbhalang Dhar hadien wa wai yaka Sports Complex ha Wahiajer heiwa ka seiñ da e ko leh yaka dorkhat hajrong ar tylli ki phang yow pynpsiah yaka ktien na Ri-loom Jaiñtia hapoh i rwai State Anthem ka Meghalaya wei wow pyrchah yei thmu ka sorkar wow wanrah yaka luti rel ha Ri Jaiñtia.
Ka seiñ da pynsñiaw ko ha u Montri Rangbah wa ha u Symbood Montri Rangbah wa i ktien na Jaiñtia toh u mih ko hapoh ka thup rwai State Anthem wei katkam ka dorkhat da ong wa ka yakhih ha North East toh kawa sdang nadooh wa em ka Jaiñtia National Durbar kawa da sdang nadooh u snem 1900, wei hadooh wa yoh yaka jylla na ka Assam ha u snem 1972, da leh deiwa ah na ki ar tylli ki District na Assam kitæ ka United Khasi and Jaiñtia Hills wei kawi won toh ka Garo Hills.
Da ong leh wa yaka jylla Meghalaya da pynkha deiwa em ki le jaitbru kitæ ki Khasi, Jaiñtia wa Garo.
Heiyatoh won waka luti rel, da dawa wow e chwa yaka Inner Line Permit (ILP) yow khanglaad yei wan psiah laitlan ki bru wa na baar yow lait leh u thut i khih i khan ki bru kiwa khian paaid.
Da e nongmuna leh yaka Assam kawa biang ki luti rel tangwa ki mar ki mata dang toh dor hapoh Meghalaya.
Neiliang u Montri Rangbah da kular u wow chimkhia yeini i dawa ka seiñ wei daw pynsñiaw u leh ha para Montri sorkar.
Discussion about this post