Ka Narpuh Border Area Joint Action committee (NBAJAC) ynne ka 25 tarik da yoh ko u yachem wa u Kyrmen Shylla uwa man leh kam u Montri ha ka sorkar MDA yow pynsñiaw ya i dawa yong ka NBAJAC wa da toh i por u pynkha C&RD Block thymme neibynta ka thaaiñ Narpuh.
Ha ini i lai yachem wa u Montri da emlang chirup u Emlangky Lamare uwa man kam u Chairman ka NBAJAC wei uwa man leh u MDC ka Narpuh chirup wa u Secretary ka NBAJAC u Daiapherbha Lamare, ki waheh chnong, Secretary chnong waphær waphær kiwa em hapoh ka chatri ka NBAJAC.
Ha ini i yachem da yoh u pynsñiaw yei eh ka thaaiñ Narpuh waroh kawi khamtam ki chnong kiwa em ha khappood waka Bangladesh kam ka Huroi, Lejri, Lahalein, Hingaria kiwa chem chitom hadooh kattæ kattæ heipor lyiur wow yabeh chadooh cha Khliehriat neibynta ki kaam wa hap pyndep ha Block Office. Wei kamjooh leh ya ki chnong kiwa em ha khappood waka Assam kam ka Malidor, Ratacherra, Dona Bhoi, Dona Umbluh wow lai mih ki ya ki kaam yong ki cha Office yong ka Block.
Neiliang u Kyrmen Shylla da kular u wow rah ya ka Memorandum wow pynsñiaw ya i dawa yong ka NBAJAC wei u pyrchang u leh u yaklam ha ka Cabinet Meeting khnang wa ka thaaiñ Narpuh u yoh C&RD Block ko yow yoh ya i roi i paar wa salonsar khamtam ha ki thaaiñ nongkyndong.
Da khana leh cha u Montri wa neiliang ka chnong Lumshnong da kular ko u e ya i thaw mynkna wei ya ka yung krehkaam kani ka Block leh ka NBAJAC wow thooh laad thooh luti u pynchna ya ka lada ka sorkar smat ko wow e yaka Block thymme ha ka thaaiñ Narpuh.
Yaka Memorandum da e leh cha u Montri Rangbah u Conrad Sangma wa cha u Hamletson Dohling uwa man kam u Montri wa pait ya ka chnat C&RD.
