Shillong: Ki MDC ka UDP na Jaiñtia Hills Autonomous District Council (JHADC) deiwa synraan lang u General Secretary ka UDP u Dr. Jemino Mawthoh, ynne ka sngi da lai yachem ki ya u symbood montri rangbah ka jylla, u Prestone Tynsong wow kyntu wa ka sorkar wow tuklar ko wa u lat u pynsmat wow e ya ka muhor noh ya ka Bill pynku tulop ya ki MDC ka Council ya kawa da mynjur da ka dorbar JHADC dang ha ini wa dadep.
Hawa yaklam wa kiwa pathai khubor u Deputy CEM ka JHADC, u Lamdibok Sumer da ong u wa ka Bill pynku tulop ya ki MDC dang sahkut ko ha ka tnat District Council Affairs (DCA) ka sorkar jylla wei neiliang ki MDC ki kwah noh ki wow yoh ya ka muhor na u lat khnang wow man aiñ noh ko.
“I da kyntu i ya u montri wow pynsmat noh wow phah ya kani ka Bill cha u lat, neibhah hadooh katni ka Bill dang sahkut ko waka sorkar jylla,” da ong u Lamdibok. Da pyntip u leh wa neiliang u Prestone u chimkhia u ya ini i dawa yong ki MDC ka JHADC.
Nalor ini, ki MDC da kyntu ki leh ya u Prestone wow tuklar waka sorkar pydri wow khang noh yei kynthiar Party ki MDC hapoh ka aiñ Anti Defection Law.
“I kwah kwah noh i wow pynsmat yei pynkrehkaam wow pynpsiah ya ka Sixth Scheduled hapoh kani ka aiñ yow man kam wow kdoh ya ki MDC yow lait ki u skit cha wah cha neiñ kamwa man hi ha ka sorkar India,” da ong u Lamdibok.
“Ka kaam hajrong ka Sixth Schedule dang lai ko cha khmat wei katkam wa thmu, ya ka Election MDC leh ye u pynslem ya ka wei ini chong ha ka yatai ha ka dorbar Parliament kawa ye u man ha u Kmaichonglaad (Dec) uni snem,” da ong u Dr. Jemino Mawthoh.
Ha iwi tawon i liang u Lamdibok da pyntip u wa i yachem wa u Prestone da dawa leh wow pynku ya ki Constituency ka MDC na ka 30 tylli ha Jaiñtia Hills cha ka 34 tylli wei kamjooh ha KHADC wow pyntam sa 5 tylli neiwa em ko katni.
Discussion about this post