Jowai: U montri rangbah ka jylla, u Conrad K. Sangma chirup wa u symbood montri rangbah, u Prestone Tynsong da yahkhmat ki ya ki dkhot ka sorkar MDA ynne ka sngi da yachem ki ya u montri ka kaam phyung ka sorkar pyrdi, u Rajnath Singh wow pynsñiaw yei pyrchah ya ka Citizenship Amendment Bill (CAB).
Ha kani ka yachem u Conrad da pynsñiaw u wa ki lok ka sorkar MDA wa kynthup ya ka UDP, BJP, HSPDP, PDF, NCP wa ki MLA samen sñiaw ki wa kani ka CAB daw ktah ko yei man kyrpang ka jylla Meghalaya wa ka thaaiñ mihsngi iwa daw pynthut leh yei chongsuk.
“Ka Citizenship Amendment Bill daw ktah ko ya ka thaaiñ wei kani ka Bill man ko pyrchah yei sñiaw ki paidbah ka thaaiñ iwa daw wanrah yei awri awra wa kiwi kiwi,” da ong u Conrad.
U montri ka chnat Tourism, u Metbah Lyngdoh da ong u, “Ka bill da ktah ko yei sñiaw ki bru ri-loom (tribal) ka jylla Meghalaya khamtam ki khian paaid (minority communities) wei ka sorkar toh u pyndam ko ya kani ka Bill.”
U montri ka chnat pynroi sor, u Hamlet Dohling da ong u, “Ki paidbah pyrchah ki ya kani ka Bill kawa da mynjur ha Lok Sabha. Kyntu O ya ka sorkar wow pyndam noh ya kani ka Bill, ka wow wanrah chiboon i eh i khoo khamtam yei man kyrpang ki bru yong i.”
U montri ka chnat i chait i khiah, u A.L. Hek d ong u, “Waroh ha Meghalaya pyrchah ki ya kani ka Bill. Kyntu O ya ka sorkar wow pyndam ya kani ka Bill neibynta ki paidbah ka Meghalaya wa ka North East.” U MLA ka NCP u Saleng A. Sangma da ong u wa kani ka Bill daw pynwiarjait ko ya ki paidbah ka jylla.
Ha kani ka yalang da emlang u montri ka PWD u Commingone Ymbon, u montri ka PHE u Samlin Malgniang, u Chairman ka State Planning Board u Lambor Malgniang, u Renikton Lyngdoh, u S.G. Mominin wa u Govt. Chief Whip u Marcuise Marak.
U Conrad chirup wa u montri rangbah ka Mizoram u Zoramthanga da yaklam yillu ki wa u Rajnath Singh wow pynsñiaw yei sñiaw yei pyrchah ki paidbah ka thaaiñ ya kani ka Bill.
Discussion about this post