Shillong: U montri rangbah ka jylla, u Conrad K. Sangma ynne da khut u ya ka yalang wa ka chnat Transport ka jylla hei emlang u montri ka chnat, u S. Dhar, wow yaklam hajrong ki kattu katni ki kreh (project) wow leh hapoh ka jylla.
Ha ka yalang da rai wow sdang noh ya ka Institute of Driving Training and Research (IDTR) hapoh ka jylla katkam ka Scheme ka Ministry of Road Transport and Highways (MoRTH) wow pynchngaaiñ ya ki sarok.
Ki heh ka chnat Transport da pyntip ki wa em ki thaw ka chnat ha Wahiajer, West Jaiñtia Hills District wa ha Jengjal, West Garo Hills District ya kiwa da e sñiawbha mynkna da ki chnong wei dang pynkhreh ya ka Detailed Project Report (DPR) katni wow yoh yarap poisa na ka MoRTH.
Ki Inspection & Certification Centres (I&CC) daw yarap ki wow e ya ki Fitness Certificate yong ki kari heiwa ka sorkar pyrdi pynlait ko 100% ka poisa neibynta wo chna, u booh tiar wa kiwi kiwi ha kini ki Centre. Neibynta wow chna ya kam kini ki Centre emkaam ya i thaw wa heh kamwa 3 Acre wei ka sorkar dang sylli ko wow jied ya i thaw neibynta kani ka Centre ha jylla.
Ha ka yalang da yaklam leh yei emkaam ya ki Helicopter Service wei ka sorkar dang pynkhreh ko ya ka DPR wow chna ya ki Heliport ha Umsawli East Khasi Hills District wa ha Doldegiri, West Garo Hills District wow phah cha ka Ministry of Civil Aviation.
Wei da pyntip ki leh wa daw sdang noh ya i lai ki lieñsuiñ na Shillong-Delhi nadooh wa kut u Naikhynde heiwa ya kiwa jop yaka Tender da dep pynbna.
