U Montri Rangbah ka jylla u Conrad Sangma da pyntip u wa hei yachem u deilang wa u Symbood Montri Rangbah ya u Montri ki kaam pohyung ka ri u Amit Shah ynne ka sngi deiwa emlang leh ki heh ka Ministry of Home Affairs (MHA) ha Delhi, da yaklam hajrong kiwa boon ki kaam heiwa u Montri ka sorkar pyrdi da e u yei chkoor yong ko yow ap u sñiaw ya kiwa boon ki kaam wa yatoh waka jylla.
Da yaklam hajrong ka aiñ MRSSA heiwa u Amit Shah da ong u wa ka sorkar jylla wa ki heh ka MHA daw hap ki u chong yaklam bniah hajrong waroh ki kaam wa yatoh wa kani ka aiñ deiwa kyntu u leh yaka jylla wow thooh laad da ki luti wa ye u lai chakhmat.
Da pynkynmoo leh ya u Montri wa em ki seiñ napoh ka jylla kiwa kwah u yachem wa oo heiwa da ong u wa ye ki wow wan cha Parliament ha kini ki por, heijooh i por leh da pyntip u wa daw wan u cha Shillong ar sngi yow yaklam wow pynthymme yaka NEC wei daw em u ha Shillong waroh ar sngi, kamtæ da ong u wa heithaw wow wan ki seiñ cha Delhi, daw e por u yaki ha Shillong wow yachem wa oo iwa daw man ha u Wisu (March), 2021.
Neiliang u Home Minister da klam u leh hajrong i psiah tooh chapoh ka ri iwa da ktah ym du yaka Meghalaya, ka thaaiñ North East kamjooh ka ri waroh kawi heiwa da kular u wow leh katwa ye yow pyntikna wa ka dustur riti, i ktien u thylliej yong ki bru ka Meghalaya waka North East kamjooh yaka ri waroh kawi u man ki kiwa yoh yei yada.
U Shah da ong u leh wa emkaam wow kær noh ya u pood heiwa da em ki bynta wym pu em sdang wow kær ya u pood neidaw wa mih i pyrchah, kamtæ da kyntu u yaka sorkar jylla wow yaklam wa kiwa embynta ha ini i kaam yow pynbait noh ya waroh iwa eh yow ye u sdang noh yei kreh ha kitu ki bynta ki wym pu ye u sdang kreh.
