U montri rangbah ka jylla, u Conrad K. Sangma ynne da yachem u wa u montri rangbahdooh ka ri, u Narendra Modi ha New Delhi heiwa u Conrad da ekhublei u ya ka sorkar pyrdi wa da e ko T. 5,105 klur na ka bhah dan ka sorkar pyrdi wa T. 1,279 klur kam ka Revenue Gap Grant neibynta u snem wow wan (Next Financial Year).
Da kyntu u leh ya u Modi wow pdiang ya ka jylla heiyatoh wa ki kaam pynroi hapoh ka 15th Finance Commission heiwa ki kaam pynroi daw yahluti ki ya ka jylla katkam i angnood ka sorkar.
U Conrad da khana u leh ya ki kaam wa da leh ka jylla wow yakhun pyrchah ya i kylla i suiñ bneiñ (Climate Change) heiwa iwi na kini ki kaam toh wow chna ya ki kynroh wow ksoh um khamtam ka um slap.
Chooh chooh u Conrad da pyntip u leh hajrong i pynemkaam ya i spah ka rymaw heiwa da pynkreh ya ki Volunteer na ki 6500 tylli ki chnong ka jylla iwa man hapoh ka Meghalaya State Water Mission ki wow kreh katkam i yah i stat warim wa i yong ka juk katni.
Da pyntip u leh wa ka jylla angnood ko wow pynman ya ka International Conference on Climate Change and Natural Resource Management deiwa krehlang wa ka North Eastern Chief Ministers. Kani ka Conference daw pachat ya ki kyrdan wa toh wa kani ka phang wei daw mihkhmat ya ka cha ka COP26 Summit ha Glasgow, UK wei ya kani ka Conference daw pynman ha ki 3 bnai wow wan.
Da khana u leh ya ar tylli ki kreh wa emkaam bha ha ka thaaiñ, (i) Silchar-Mahendraganj-Hili Road, wa kynthup ya ka yingkieñ ha ka wah Brahmaputra, (ii) 8-Laning u sarok Guwahati-Shillong-Dawki- Sylhet-Chittagong Highway.
