U montri ka chnat i chait i khiah ka jylla, u Alexander Laloo Hek ynne da yachem u ya u montri i chait i khiah ka sorkar pyrdi, u Mansukh Mandaviya ha nongbah Delhi wow pyntip hajrong i man i long ka khlam COVID-19 ha ka jylla Meghalaya.
Ha ini i yachem u Hek da paan yarap poisa chooh u na ka sorkar pyrdi wow pynkhlan ya ki thaw sumaar ha ka jylla wow pyndap yei duna yong ki ha ki chnong wa ki Block.
Chooh chooh da booddien u leh yei thung ya u Director wa pura wa ya u Board Director of Governing Body ka North East Indira Gandhi Regional Institute of Health and Medical Sciences (NEIGRIHMS), Shillong.
U Hek da ban joor u leh yei emkaam wow pynku ya ka bhah (Seat) puræ Doctor neibynta ka jylla wei wow pynboon chooh ya ki Doctor khamtam ki Specialist ha NEIGRIHMS neibynta ka jylla wa ka thaaiñ mihsngi hi waroh kawi yeiwa u Mansukh da kular u wow chimkhia hajrong ini.
Ha nongbah Delhi, u Hek da yachem u leh ya u montri ka chnat AYUSH, u Sarbananda Sownowal heiwa da tyrwa u wow sdang noh ya ka Directorate of AYUSH heiwa i lut u kynjoh i duna ya ka T. 4. klur (T. 3,84,90,852) i wow kynthup yei pynmih kreh ha ki kyrdan yong ki District Hospital, PHC wa CHC.
Neiliang u Hek da yachem u leh ya u montri ka sorkar pyrdi wa pait ya ka chnat Labour, Employment wa Petroleum, u Rameshwar Teli heiwa uni u montri ka sorkar pyrdi da kular u wow pynlait poisa neibynta wow chna ya ka thaw sumaar 50 Bedded ESIC Hospital ha Shillong.
