Shillong: Uwa yahkhmat ka Congress uwa man leh heijooh i por uwa yahkhmat ka liang pyrchah ha ka jylla, u Dr. Mukul Sangma da ong u wa ka sorkar toh u pynkrehkaam chwa ko da ka Meghalaya Residents Safety and Security Act, 2016 katwa dang yang yei yoh mynjur ya ka ILP na ka sorkar India.
U Dr. Mukul Sangma deilang wa ki MLA ka Congress, ynne ka sngi da yachem ki ya u Lat ka jylla, u Satya Pal Malik hajrong i dawa pynkrehkaam ya ka Inner Line Permit wa i e muhor ya ka MRSSA Amendment.
Da ong u wa neiliang ka sorkar da toh u paan chwa ko ya ka MRSSA Amendment na u Lat wei toh u pynkrehkaam chwa kamwa da mynjur ha u snem 2016, deiwa ong leh wa lada emkaam i pynkylla ha katai ka aiñ, ka sorkar toh u wanrah biang ko ha yung dorbar chna aiñ. Da ong u wa i wanrah yong ka sorkar warim ya ka MRSSA, 2016 toh hadien wa da bichaar bha wei neibynta wow pynkrehkaam pura ya ka aiñ, ka sorkar ha itu i por da pynkhlan ko leh ya ki chnat krehkaam ha waroh kawi ka jylla deiwa pynkha chooh chooh ya ki Block wa District wei kamjooh ya ki Police Station.
Hawa yatoh wa ka ILP, u Dr. Mukul da ong u wa toh i dawa iwa da slem da ki seiñbhalang ka jylla, wei i chim ya ka rai wow pynkrehkaam ya ka ILP ha kani ka jylla da ka yung dorbar ha u snem wa da dep toh neidaw wa pynman aiñ ka sorkar pyrdi ya ka Citizenship Amendment Act (CAA), kawa ye wow wanrah yei maa ya ka jylla na i wan buhai chnong ki bru wa na baar, khamtam wa ka jylla Meghalaya ka em ko u pood wa jrong wa ka ri Bangladesh wei kamjooh wa ka jylla Assam.
