Shillong: U slap wa u phria ha kini ki ar sngi wa dadep da wanrah u yei jæd i pra ya ki spah tylli ki manyung ha kiwa boon ki chnong hapoh ri-loom Khasi wa Jaiñtia, khamtam kam ha Mynso, Myntkung wa Pamanik ha kani ka 31 tarik wa ha Sohmynting ynnin ka sngi.
Ynne ka sngi u MLA ka 2 Jowai Constituency, u Wailadmiki Shylla da lai yachem u ya u montri ka tnat Revenue & Disaster Management ka sorkar, u Kyrmen Shylla wow pynsñiaw yeiwa chah ktah ki manyung ha Sohmynting heiwa da kyntu wow e yarap cha kini ki manyung.
Ha kani ka yachem da yaklam leh chaphang ki manyung kiwa da chah ktah ha ka 31 tarik ha Mynso, Myntkung wa Pamanik.
Neiliang u Kyrmen da hukum u ya ki bor district ka West Jaiñtia wow booddien ki yeini wei wow e yarap cha kini ki manyung wa chah ktah.
Da kular u leh wow e yarap cha kini ki manyung katwa ye neiliang ka tnat ka yong oo.
Discussion about this post