Ka khlam u COVID-19 dang pteiñ ko kat dang mih ki sngi wei ka jylla kamjooh leh ka Ri-loom Jaiñtia da man ko kawi na kiwa chah ktah joor bha ha kani ka khlam heiwa ki bru da hap chong yung ki da ki tayaw kattu.
Ha kani ka kynti, u montri ka chnat Bhalang (Social Welfare) ka jylla uwa man leh u MLA ka 6-Khliehriat Constituency, u Kyrmen Shylla dei mynsien wa sñiawkhia da tia biang u chaphrang wow yarap pynstiñ ya ka lyngkor ki bru kiwa da chah ktah ha kani ka khlam COVID-19 kawa da wan ha ka la-ær wa ar kattu.
Ynnin ka sngi neiliang uni u Montri da sdang u ya ka HOPE-LINE COVID-19 RELIEF, heiwa da booh ya ki number phone wow yarap ya ki manyung kiwa chah ktah ha ka khlam deiwa tyrwa wow e ya ki mar-baam, ki sula yada PPE, wa kiwi kiwi cha ki manyung hapoh ka Constituency.
Hawa yaklam wa u Kyrmen Shylla, da ong u wa kam ha ini i por da em ki manyung kiwa haap chong-kset hapoh yung khlem yoh laad wow lai khih lai kreh wei kam kini ki manyung ye ki wow phone ha u number wa da booh ha u HOPE-LINE : 6001061664 heiwa mar yoh yei paan yarap daw pynsakhiat yei thaw sah yong ki khnang wow lai e yarap cha kini ki manyung kat i khon wa yoh.
Da ong u leh wa katkam wa man katni dang ye wow pdiang ya i paan yarap du ha ki por sngi donhi neibhah wa boon ki bru ha kani ka HOPE-LINE toh kiwa kreh monsñiawbha donhi.
Heiyatoh wa ynne ka sngi won wa da sdang sa pynkrehkaam ya ka Ambulance hapoh ka Constituency neibynta kiwa chah ktah ha kani ka khlam, da ong u wa daw ye u pynemkaam ya ka wow kit ya ki bru kiwa chah ktah ha kani ka khlam na yung cha ki thaw sumaar katkam wa emkaam ki.
Heiyatoh wa kani ka Ambulance, u Kyrmen da ong u wa ya ka ni ka kari da e sñiawbha da ki kattu katni ngut ki bru kiwa kwah wow kyrchaan ya ki manyung kam ha ini i por, deiwa pynrap leh wa kani ka Ambulance u chakri ko kyrpang du ya ki paidbah hapoh ka 6-Khliehriat Constituency tangwa lada jia wa chong ko wei da emkaam ya ka wot da ki bru na ki chnong wa em hapoh ka 5-Sutnga Saipung Constituency leh ye ki wow pynemkaam ya ka.
Heijooh i por u Kyrmen da pyntip u wa katkam wa man katni ki bru chem chitom bha ki wow kit ya kiwa da khlaad na u COVID-19 khamtam na Shillong cha jar jiar ki yung wa ki chnong yong ki wow pyndep ya ka lehniam wa khaddooh, wei heiyatoh wa ini da pyntip u leh wa da yaklam u wa ki bor District ka East Jaiñtia Hills khnang wow ye u pynbiang ya ka kari wow kit metyap namo ka Mortuary Van heiwa da pynyang chwa ya kiwa yah ya ka kari khnang wow kit ya ki metyap cha ki thaw wow pyndep ya ka lehniam wa khaddooh ya ki.
