Shillong: Ki MLA ka Congress ha kani ka jylla wa kiwa kitkaam yong ka, wa ki dkhot da pynman ki ya ka yalang wow pyrchah ya i e laad u Lat ka jylla Karnataka wow chna sorkar ka BJP hanlada ym yoh boon paaid ko wei kani ka pyrchah da pynman leh ha kiwi tawon ki jylla ka ri.
Da phah leh ya ka chithi cha u President ka ri, u Ram Nath Kovind lyngba ka yung krehkaam u Lat ka jylla, wow chimkhia yeini i leh ka BJP ha Karnataka nalor kiwi ki jylla kam ka Goa, Manipur, Meghalaya heiwa ka party yoh ko yei boon paaid ki MLA tangwa ym yoh ko wow chna sorkar.
Ha kani ka yakhih da rah ya ki kot-rben wa thoh ya ki kyntien wow beiñ ya ini iwa jia heiwa da pynbaad ko wa ini i leh da tynyap i ya ka synchaar paidbah ha ka ri.
Ye wow kdaw heini wa ha Karnataka, ka BJP da yoh ko 104 ngut ki MLA, katwa ka Congress da jop ko 78 wa 37 ngut ka JD (S) nalor 2 ngut ki MLA samen ha ka yung kawa 222 ngut.
Ka BJP da yoh ko yei boon MLA tangwa dang duna ko sa 8 ngut ki MLA wow chna sorkar samen wei ka Congress wa ka JD (S) kawa ya synrop lang em ko 117 ngut ki MLA tangwa u Lat ka jylla da khut u ya ka BJP wow chna sorkar.
Hajrong ini, ka Congress da ujor ko cha ka Supreme Court wa ka Kasari kawa da booh mynstep wow pynyoo bor.
Neiliang u president ka MPCC u Dr. Celestine Lyngdoh hawa yaklam wa kiwa pathai khubor ynne ka sngi, da ong u wa i yakhih toh wow pyrchah yei leh embor ka BJP ha Karnataka. Da ong u wa ka Congress da beiñ joor ko yeini i leh u Lat ka jylla Karnataka.
Katwa ka Ampareen Lyngdoh, ka MLA ka East Shillong da pynbaad ko wa ka BJP da tyngkheiñ ko ya ka riti synshar ka ri wei ini man i iwa ymye u pdiang wei ka BJP da leh ko yeini ha Manipur, ha Goa wei katni won ha Karnataka.
Ini i leh man i iwa pyrchah aiñ wei ka Congress pyrchah joor ko ya ini wei ki paidbah toh u yoo ki wa ka Meghalaya leh pyrchah ko ya ini.
Discussion about this post