Ka nongbah Shillong ynne da dap ko da ki pulit wa ki bor pynlai District neidaw wa wan poi u Union Home Minister, u Amit Shah wei da hap ki wow phet chawah chaneiñ neidaw wa i mih ki ar seiñ wow pynman yakhih ha ki ar tylli ki thaw.
Ka Voice of the People Party (VPP) da mih ko wow pynman yakhih deiwa chong kyllaiñ myngngor hakhmat ka Secretariat, tangwa ki dkhot yong ka VPP da chah khang luti noh ki ha ki pulit wa ki Magistrate, neidaw wa da pynkrehkaam da ka Section 144 CrPC, kawa da khang wow yalang paidbah palat 4 ngut ha ki thaw wa em hajan ka Secretariat, Additional Secretariat wa ha yung u Lat.
I mih pynman yakhih ka VPP toh hajrong i dawa naka sorkar wa toh u thung kreh biang ya ki 3 ngut ki Officer ka Lokayukta kiwa da chah beh kreh ha u Kmaichonglad (Dec) 2023.
Ha kani ka yakhih yong ka VPP da em leh i yania wei pynyoo bor deiwa ya khynngiat wei ki pulit leh da ksoh ki ya u MLA ka Mawlai, u Brightstarwell Marbaniang.
Kawi won ka yakhih toh kawa pynman syndet da ka seiñ Hynniewtrep Youth Council (HYC), hakhamat u mot yong u Kiang Nangbah wa em hajan ka Shillong Civil Hospital.
Ini i mih syndet ka HYC ha kani ka sngi wa u Union Home Minister em u ha Shillong toh yow pyrchah yei wym bna ka sorkar India hajrong i pynsñiaw ka jylla, itæ toh yow pynkrehkaam noh yaka Inner Line Permit wei wow tipmit noh ya ka ktien Khasi hapoh ka 8th Schedule.
Yow khanglaad ya ki dkhot ka HYC, ki pulit da ker kut ki ya kani ka thaw yakhih wei da em leh i pynyoo nia wa i pyrchang yong ki pulit wow taan ya kiwa yahkhmat ka seiñ.
Discussion about this post