Yakhih wei beiñ ka MPCC ya ka sorkar NDA neidaw wa ku dor ware i phniang kari

Jowai: Ka Meghalaya Pradesh Congress Committee (MPCC) kam ka dak wow em bynta wa i yakhih ka All India Congress Committee (AICC) ha waroh kawi ka ri India neidaw wa ku dor i phniang kari wa kiwi ki mar.

Ynne ka sngi ka Congress kawa em ha ka liang pyrchah ha Parliament da pynman ki yei khang chnong kamjooh i yakhih ha kylleiñ ka ri neidaw wa ku dor ware i phniang kari iwa da ktah ya ki paidbah, ha Shillong ka MPCC da pynman yakhih ko dei lai paidbah na Khyndailad cha Congress Bhavan kawa em ha Jail road.

Ha ini i lai paidbah ki dkhot ka MPCC da rah ya ki kot rben kiwa da thoh ya ki kyntien wow beiñ ya ka sorkar BJP wa ya u montri rangbahdooh ka ri u Narendra Modi deiwa pynbaad wa ka sorkar NDA toh kawa lehbeiñ ya ki paidbah wa dooh wa duk wa ki warep.

Kiwa pathai khubor da yoh ki wow yaklam hadien ka lai paidbah wa ki heh ka MPCC wa kynthup ya u secretary ka AICC Incharge Meghalaya, u Luizinho Faleiro wa uwa yahkhmat ka liang pyrchah ha ka jylla, u Dr. Mukul Sangma.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

U Dr. Mukul da ong u wa ka Party yakhih pyrchah ko ya ka rukom krehkaam wa ki thong ka sorkar NDA wa yahkhmat da ka BJP kiwa man pyrchah ya i mon ki paidbah wei wa ini i yakhih toh wa kwah ki wow pynneh ya ka ri wei ka Congress daw kreh bait ko wow pynneh yei hok ki paidbah, wei ka MPCC kyrchaan ya kani ka yakhih ha waroh kawi ka ri pyrchah ya ka sorkar NDA.

U Luizinho Faleiro da ong u wa heipor wa synchaar ka Congress, ka BJP klam pyrchah ko yei ku dor tangwa hawa wyrchaw wei pynku dor ka sorkar BJP da man i iwa palat pood wei ka BJP da lute ko ya ki paidbah ka ri.

Da ong u wa 4 snem nachwa ka BJP da kular ko ya ka i bneiñ ya ki paidbah, tangwa katni won ym em leh ko iwon iwon hajrong i kular ko nadooh i yoh kreh, ka poisa baam-tooh, wot i ku dor ki mar.

Da ong u wa i pynku dor ya i Petrol da man i palat 200%, wei i Diesel hadooh 450% deiwa pynrap wa ka sorkar BJP da dai ko yei Petrol cha kiwi ri ha i dor wa khian katwa ki tre ri won da dai syad dor.

Chooh chooh ka BJP heipor wa lehkmen dap snem ka sorkar MDA da paan poisa ko na ki Company wa pynmih phniang wei katni neibynta wow su kylliang ya ki Company da thombor ko ya ki paidbah deiwa pynku dor.

Heiyatoh wa i thmu ka sorkar wow kynthup noh ya i Petrol ha ka GST, neiliang u heh ka AICC da ong u wa ka Party daw haap pait ko hadooh katwon ini u yarap i.