Ynnin ka sngi haka Dorbar Tlang wa chi sngi yong ka Jaiñtia Hills Autonomous District Council (JHADC) wa pynlai da u Chairman, u Dr. Sankey Shangpung, najrong kiwi ki phang yukylli wa da wanrah da ki MDC liang pyrchah wa kynthup ya u Awhai Andrew Shullai, u Brightstar Chyrmang kiwa da kylli hajrong i sahteiñ ka tulop kiwa kreh JHADC, i sahteiñ ka Iawmusiang Shopping Complex wa kiwi, ki MDC da yachim bynta haroh ki u yaklam hapoh ka dorbar hajrong u pood u ang ka JHADC wa ya takhooh pood ko waka jylla Assam.
Hajrong kani ka phang, u Awhai Andrew Shullai, MDC ka Jowai Central da kylli u yaka yurim yong ka JHADC hajrong ki thaw khappood wa mih yakajia neipor cheipor hapyrdi ka jylla Meghalaya wa Assam.
Neiliang u Executive Member, u Finelyness Bareh hawa jubab ong u ka chnong Khanduli haap ko hapoh ka Elaka Nongjngi, ka Lapangap, Mukroh haap ki haka Elaka Shilliang Myntang, ka Mowluber, Khatkhasla, Psiar won hap ki hapoh ka Elaka Raliang wei da em ki leh hapoh u pood u ang wa pura yong ka JHADC. Tangwa neiliang ka sorkar Assam neipor cheipor da pyrchang kyntoor pood ko cha kini ki chnong.
Hawa pynrap yei jubab u Finelyness Bareh, neiliang u Chief Executive Member ka JHADC, u Thombor Shiwat khana u wa neiliang ka sorkar jylla leh da paan jubab ko naka JHADC hajrong i chem yong ka ya ki thaw wa yakajia pood waka jylla Assam. Wei da pyntip u wa da phah ki cha ka sorkar yow pynksan wa kitai ki chnong wa da kdaw da u Finelyness Bareh toh u neh u sah ki hapoh Meghalaya wei kamjooh leh ki chnong Pnar wa haap hapoh Elaka Labang Nongphyllut toh u pynuiñ biang cha Meghalaya.
Heiyatoh waka Iawmusiang da pyntip wym pu em yoh ya ka bhah wa ar naka chnat DoNER yow pynchna ya iwa dang sah katwa yaka tulop won ym pu em pynlait ka sorkar jylla ya ka bhah ka JHADC.
Ha kani ka sngi u CEM da wanrah haroh u yaka Report hajrong ka Bill “The Jaiñtia Hills Autonomous District (Village and Town Development Council Bill 2023 as rectified by the State Govt”.
Discussion about this post