I Tunnel wa dang chna ha NHPC Teesta Stage VI Hydroelectric Project ha Namchi District ka Sikkim da oor i ha ka 20 tarik uni u bnai heiwa da yap 10 ngut, da mynsoo 12 ngut wei dang sahkut sa 18 ngut hapoh.
I pynlait ya kiwa sahkut da thut i nei joor u slap wei synjor i khyndaw hapoh Tunnel wei da em leh i suba wa lait ka la’ær Methane.
I oor khyndaw da jia i heipor kamwa 3:09 i sngi ha Samardung Tunnel ha Jholungey heiwa ini i oor khyndaw da kah i ya i Tunnel.
U Deputy Commissioner ka Namchi, u Anupa Tamling da ong u wa ka Fire and Emergency Services da pyrchang ki wow psiah ar sien tangwa da randien noh ki neidaw ka la’ær Methane. Kamtæ da wan ka National Disaster Response Force (NDRF) kiwa da pynemkaam ya ki tiar wa kyrpang wow psiah chapoh.
Kiwa kreh kiwa lait napoh Tunnel da ong ki wa da sñiaw ki yei pdung chwa wow em i oor khyndaw iwa pynman ya ki wow yut neini.
Katkam wa man katni ki bru chemphang ka NDRF, State Disaster Response Force (SDRF), Sikkim Police, Fire and Emergency Services, NHPC, ka Namchi District Administration, Health Department wa kiwi da kreh ki chirup wow pynlait ya kiwa sahkut.
U Chief Minister, Prem Singh Tamang da ong u wa da booddien u ya i kaam pynlait ya kiwa sahkut heiwa da khang leh ya ki sarok cha ini i thaw khnang wow ye u pynsuk yei lai i wan kiwa embynta wow pynlait ya kiwa sahkut ha Tunnel.
Discussion about this post