Ki pulit ka South West Khasi Hills ynne i step heipor kamwa 7:30 da pyntip cha ki wa da wanrah ya kawi ka metyap yong kawi ka manbei cha Mawkyrwat Civil Hospital, heiwa ki Doctor da pynbna ki wa da khlaad noh ko chwa wow poi cha ka thaw sumaar.
Mar ya tip yeini, ki pulit ka Mawkyrwat Women Police Station da lai ki wut-wut cha katai ka Hospital, heiwa da chem ki wa i pyrtuid ka kynthai toh ka Snity Wahlang (56 snem) kawa man u kurim u Drap Wanniang wa chong wa sah ha ka chnong Pyndenumsaw.
Ki pulit da chem ki wa kani ka manbei da em ko hei mynsoo wa joor hachwa wow khlaad, wei da chah pynbaad wa da chah dat chah bom ko da ki tiar wa nep ha u Bailing Wahlang (62 snem) uwa man u payu ko, wei da chem ka da kiwa chong chnong hapyrdi wa dang mynsoo joor ko wei da pynkit noh cha Civil Hospital ha Mawkyrwat.
Neiliang ki pulit da pynman ki yei takit ya ini i metyap katkam ka kyndon wa da booh chwa wow e kti noh cha u Medical Officer yow leh u yei kaam. Ki pulit da lai ki leh cha ka thaw wa chem ya kani ka manbei yow takit wei da kær kut noh yow lait u em kiwa pynthut ya ki sabut.
Chooh chooh neiliang ki bru ka chnat Crime Scene Unit (CSU), da lai ki cha kani ka thaw wa jia ha chnong Pyndenumsaw, heiwa da em u Secretary chnong.
Hei takit da chem wa u Bailing mar ya dep u wow leh yei kaam wa chah pynbaad u, da yut noh u nei thaw yow lait nei chah kem.
Neiliang ka yung ka sem da ujor ko da ka FIR hajrong ini wa jia wei hadien wa pyndep ya waroh kiwa emkaam da e kti noh yei metyap cha ki.
Discussion about this post