Ynne ka sngi da man ko ka wow sahkynmoo heiwa ka JHADC da yoh ko ya ka Website wa thymme yong ka ha ka yalang wa da pynman ha Conference Hall ka Council heiwa u CEM, u Thombor Shiwat da man u kam u kongsan.
Ya ka yalang da pynlai da u Medling Swer, u EM wa pait ya ka Statistics and Information Department hei emlang ki MDC ka Liang Synchaar, ka Liang Pyrchah wa ki sahep na ki chnat ka Council.
U Medling Swer da khana u wa ka Council da jooh em ko ya ka Website tangwa ym em de krehkaam ko la kamwa 13-14 snem wei da chna pynthymme ya ka dei yarap yong ka NIC.
Da yooluti u wa deiwa em kani ka Website daw yarap bha ko ya ki paidbah khamtam ya kitu kiwa thooh bñiah chaphang ka Council wa ka Ri-loom Jaiñtia.
Neiliang u Thombor hawa e i klam da ong u wa ka Website warim ym em de krehkaam ko la kamwa 13-14 snem heiwa ym de leh wow pynkylla yei pyrtuid u Chairman wa CEM da kiwa thymme tangwa da sñiawkmen u wa da yoh noh ya ka Website wa thymme kawa biang ha kiwa boon ki bynta deiwa e khublei ya u EM Incharge ka Department kamjooh kiwi kiwa kreh yong ka.
Da ong u leh wa ye u man wa em i duna kajiak heini heitai ha ka Website kamtæ da kyntu u ya waroh wow kdaw wow pynyoo khnang wow ye u pynbait yeitæ.
Da ong u wa katni da emkaam u kreh katkam wa yah i por deiwa booh ya ki yutip wa bniah nadooh i yoh i laa wa i dooh ka Council deiwa e khublei u leh ya ki MDC waroh wa da krehlang wow wanrah ya kani ka Website.
Chooh chooh da ong u wa na kani ka Website daw ye ki bru wow Download ya ki Form wa jooh e ka JHADC kam ki NOC, Land Holding wa kiwi kiwi khlem da emkaam de u wan thooh ya ki na Office ka Council ha Jowai.
Ha kani ka sngi da yoh i klam na u Chairman ka Council, u Dr. Sankey Shangpung neitæ uwa yahkhmat ka Liang Pyrchah, u Andrew Shullai wa i batai chaphrang ka Website na ka Poilang Langstang kawa man ka Computer Engineer.
Discussion about this post