I mih ka khubor wa ka sorkar ymye ko wow yarap ya ki manyung ki san ngut kiwa yap nei riñ mynsien ya ka la’ær wa manbih hapoh thlu-um ha Lapalang, iwa da jia ha i janmiet ka 10 tarik heiwa kiwa boon da phylla ki hawa kynmoo ya kiwa yap hapoh krem tih mooyong wa tih pyrchah aiñ kiwa yoh yarap nadooh ka sorkar pyrdi wa na ka sorkar jylla kamjooh.
Kawi ka manbei kawa man ka tre yung yong ki 2 ngut kiwa lai yarap ya 3 ngut kiwa khih mylla, ka Asenla Nongrum da pynbaad joor ko ya ka sorkar deiwa kynmoo yei pdung i krem mooyong ha Mynsngat-Thangskoo, East Jaiñtia Hills heiwa ka sorkar da pynbna ko wow e yarap, katwa ya kini kiwa mylla wa ya 2 ngut kiwa lai yarap ym em u pyrkhat ko katwa em.
Neilang kani ka manbei da kyntu ko ya ka sorkar wow pyrkhat biang wei wow thooh ki laad yarap neibynta kiwa yap ha Lapalang.
Kam wow kdaw heini, da em i pdung i krem mooyong ha uni u snem ha Thangskoo heiwa da em palat 30 ngut kiwa yap.
Kiwa khih mylla ha ini i krem mooyong toh kiwa na Assam wa Nepal wei hadien ini ka yung krehkaam u Prime Minister da pynbna yarap u wa Rs. 2 lak cha ki manyung kiwa yap wa Rs. 50,000 cha kiwa mynsoo, kamjooh neiliang u Chief Minister ka jylla da pynbna u Rs. 3 lak cha ki yung kiwa yap, wei wot ka sorkar Assam leh da pynbna yarap ko ya kiwa yap na katai ka jylla.
Discussion about this post